Лионел Месси «Барселона» билан янги шартнома имзолашга рози, аммо томонлар футболчининг маоши борасида бир қарорга кела олмайапти. Бу ҳақда Uff.uz хабар берди.
Каталонияликлар футболчининг отаси бошқарадиган Месси Манагемент компаниясига беш йиллик шартнома ва 200 миллион евро маош таклиф қилмоқчи. Йилига 40 миллион евро маош берилиши кўзда тутилган бу шартномага кўра, клуб Мессининг рекламадан топадиган даромадининг 20 фоизига эгалик қилиши лозим бўлади.
Мессининг вакиллари эса ўз навбатида «Барселона» билан 4 йиллик шартнома имзолаб, 400 миллион евро беришларини талаб қилмоқда. Шу билан бирга клуб футболчининг рекламадан топадиган пулига умуман даъвогарлик қилмаслиги лозим.
Euromericas Sport Marketing томонидан берилган баҳога кўра, Мессининг айни вақтдаги қиймати 492 миллион еврони ташкил қилади. Эслатиб ўтамиз, айни вақтда Месси дунёнинг энг кўп даромад қиладиган 10 спортчиси сирасига киради ва йилига 41,3 миллион доллар ишлаб топади. Бу маблағнинг 20,3 миллион доллари «Барселона»дан оладиган маоши бўлса, 21 миллион доллар рекламадан тушади.
Изоҳ (0)