2014-yil 3-mart kuni O’zbekiston Respublikasi Prezidenti Islom Karimov “Zulfiya nomidagi Davlat mukofoti bilan taqdirlash to‘g‘risida”gi Qarorga imzo chekdi. Qarorning rasmiy matni O‘zA saytida e’lon qilindi. Bu haqda huquqshunos Xushnudbek Xudayberdiyev o‘z saytida xabar berdi.
Prezident qarorida ta’kidlanishicha, mazkur qaror “yurtimizda mo‘tabar ayol zotiga munosib hurmat-ehtirom ko‘rsatish, ularning ijtimoiy hayotimizdagi o‘rni va nufuzini oshirish, barkamol xotin-qizlar avlodini voyaga yetkazish maqsadida hamda O‘zbekiston Respublikasi Prezidentining 1999-yil 10-iyunda qabul qilingan ‘Zulfiya nomidagi Davlat mukofotini ta’sis etish bo‘yicha takliflarni qo‘llab-quvvatlash to‘g‘risida’gi farmoniga muvofiq qabul qilingan nizomga asoslangan”.
Zulfiya nomidagi Davlat mukofoti bo‘yicha ko‘zda tutilgan 14 ta mukofot o‘rniga 2014-yil uchun istisno tariqasida 16 ta mukofot beriladigan bo‘ldi.
Mazkur yilda Surxondaryo hamda Xorazm viloyatlaridan istisno tarzda ikki nafar qiz mukofot bilan taqdirlangan.
Prezident Qaroriga ko‘ra, Zulfiya nomidagi Davlat mukofoti bilan taqdirlanganlarga 8-mart – Xalqaro xotin-qizlar bayramiga bag‘ishlab o‘tkaziladigan tantanalarda sovrindorlik diplomlari va ko‘krak nishonlari topshiriladi.
Shuningdek, Zulfiya nomidagi Davlat mukofoti sovrindorlarining har biriga eng kam oylik ish haqining 50 baravari miqdorida pul mukofoti beriladi (4 mln 805 ming 250 so‘m).
Eslatib o‘tamiz, Zulfiya nomidagi Davlat mukofoti 1999-yil 10-iyunda ta’sis etilgan bo‘lib, har yili an’anaviy tarzda maktab, litsey, kollej va oliy o‘quv yurtlarida a’lo xulqi, o‘qishdagi muvaffaqiyatlari, ijtimoiy faolligi bilan alohida iste’dodini namoyon qilib ta’lim olayotgan, istiqlol g‘oyalarini amalga oshirish yo‘lida astoydil mehnat qilayotgan iqtidorli qizlarga adabiyot, madaniyat, san’at, fan, ta’lim sohalaridagi hamda jamoatchilik faoliyatidagi alohida yutuqlari uchun beriladi.
Zulfiya nomidagi Davlat mukofoti sohibalari bo‘lgan maktab, litsey, kollej o‘quvchilari tanlagan yo‘nalishlari bo‘yicha oliy o‘quv yurtlariga kirish imtihonlarisiz qabul qilinadilar.
Davlat mukofoti dastlab 25 yoshgacha bo‘lgan qizlarga berilishi nazarda tutilgan bo‘lsa, 2006 yildan boshlab 14 yoshdan 22 yoshgacha bo‘lgan qizlarga berilishi belgilab qo‘yilgan.
2014-yilda Zulfiya nomidagi Davlat mukofoti bilan taqdirlanganlar:
- Joldasbayeva Ayjamal Maxsetbay qizi – Qoraqalpoq davlat universiteti qoshidagi 1-akademik litseyning 2-bosqich o‘quvchisi
- Abdumutallibova Oydinoy Kamoliddin qizi – Andijon pedagogika va ijtimoiy-iqtisodiyot kollejining 3-bosqich o‘quvchisi
- Namozova Mohinur Bobirovna – Buxoro tumanidagi 6-umumiy o‘rta ta’lim maktabining 9-sinf o‘quvchisi
- Xolbekova Yoqutxon Nazarqosim qizi – Jizzax transport, aloqa kasb-hunar kollejining 3-bosqich o‘quvchisi
- Nodirova Maftuna Rustamovna – Qarshi davlat universitetining 4-bosqich talabasi
- Qosimova Zariya O’ktamovna – Navoiy viloyati Zarafshon kompyuter texnologiyalari kollejining 1-bosqich o‘quvchisi
- Usubjanova Shohsanam Azamjon qizi – Namangan viloyati Kosonsoy tumanidagi 22-umumiy o‘rta ta’lim maktabining 8-sinf o‘quvchisi
- Olimova Durdona Olim qizi – Samarqand shahridagi Siyob tibbiyot kollejining 1-bosqich o‘quvchisi
- Xoljigitova Dilbarxon Baxodir qizi – Guliston davlat universiteti qoshidagi 1-akademik litseyning 3-bosqich o‘quvchisi
- Barotova Lutfiya Abdusattop qizi – Surxondaryo viloyati Termiz qishloq xo‘jalik kasb-hunar kollejining 1-bosqich o‘quvchisi
- Yusupova Nilufar Qodir qizi – Surxondaryo viloyati Termiz san’at kollejining 3-bosqich o‘quvchisi
- Abdulxakimova Sevara Odil qizi – Toshkent viloyati Angren axborot texnologiyalari va sanoat kasb-hunar kollejining 1-bosqich o‘quvchisi
- Mamadibragimova Dinoraxon Muhammadrayim qizi – Chirchiq olimpiya zaxiralari kollejining 2-bosqich o‘quvchisi (Farg‘ona viloyati)
- Atajonova Gulyar Komiljon qizi – Urganch davlat universitetining 3-bosqich talabasi
- Rominova Nasiba Toxir qizi – Xorazm viloyati Xiva tumanidagi 7-umumiy o‘rta ta’lim maktabining 9-sinf o‘quvchisi
- Xakimova Xurshida Sarvar qizi – Toshkent shahri Yunusobod tumanidagi 122-umumiy o‘rta ta’lim maktabining 9-sinf o‘quvchisi
Izoh (0)