Qashqadaryo viloyatida o‘zaro kelishmovchilik natijasida bir yigit “samosud” qilindi. Viloyat IIBga ko‘ra, holat yuzasidan jinoyat ishi qo‘zg‘atilgan.
Qayd etilishicha, 21-aprel kuni taxminan soat 16:00 larda Qarshi shahrida yashovchi T.A. tanishlari bilan guruhga birlashib, o‘zaro kelishmovchilik natijasida Qarshi tumanida yashovchi X.D.ni “Vatanparvarlar bog‘i” oldidan Matiz rusumli avtomashinaga mindirgan va shaharning “G‘afur G‘ulom” mahallasining chekka hududiga olib borib, kaltaklagan.
Holat yuzasidan Qarshi shahar IIO FMB huzuridagi Tergov boshqarmasi tomonidan Jinoyat kodeksining 277-moddasi (bezorilik) 2-qismi “b” bandi bilan jinoyat ishi qo‘zg‘atilib, gumonlanuvchi Jinoyat protsessual kodeksining 221-moddasi tartibida ushlangan.
“Samosud” bilan bog‘liq holatlar
Aprel boshlarida Qoraqalpog‘istonda ayol o‘zidan olti yosh katta ayolni “samosud” qilgani to‘g‘risida xabar berilgandi. O‘shanda 30 yoshli ayol 2000-yilda tug‘ilgan ayolni har xil so‘zlar bilan haqoratlab, Instagram sahifasiga joylashtirgani aniqlangan.
2023-yilda Buxoro viloyati Kogon tumanida uch nafar ayol va bir erkak o‘zaro til biriktirib, boshqa bir ayolni “samosud” qilgandi. Shuningdek, Namangan viloyati Chust tumanida 21 yoshli yigit o‘zidan 4 yosh kichik bolalar tomonidan “samosud” qilingani, Toshkentda 5 nafar qiz tengdoshini kaltaklagani, surxondaryolik ayol bir necha ayollar tomonidan “samosud”ga uchragani to‘g‘risida xabarlar berilgandi.
Izoh (0)