O‘zbekistonda investitsiyalar yiliga o‘rtacha 14,5 foizdan o‘sib, 2017—2023-yillarda jami 1 kvadrillion 460 trillion so‘mdan ortiq kapital qo‘yilmalar amalga oshirilgan. Bu haqda Toshkent davlat iqtisodiyot universitetida “Moliya tizimini rivojlantirishning zamonaviy tendensiyalari va istiqbollari” mavzusida bo‘lib o‘tgan xalqaro ilmiy-amaliy anjumanda ma’lum qilindi.
-gxLc53w_.jpg)
Institut katta o‘qituvchisi, ilmiy tadqiqotchi Madinabonu Abdullayevaning “Daryo” jurnalistiga bildirishicha, anjumanda moliyaviy tizimni rivojlantirish masalalari muhokama qilingan.
Anjumanning asosiy g‘oyasi sifatida “O‘zbekiston – 2030” strategiyasida belgilangan maqsadlarga erishish, moliya sohasidagi ustuvor yo‘nalishlar bo‘yicha strategik vazifalarni bajarish, shuningdek, O‘zbekiston Respublikasi oliy ta’lim tizimini 2030-yilgacha rivojlantirish Konsepsiyasi doirasida oliy ta’limni modernizatsiya qilish, ilmiy salohiyatini oshirish, ta’lim va fanni rivojlantirish yo‘lida xalqaro hamkorlikni mustahkamlash maqsad qilingan.
Xalqaro anjuman geografiyasi o‘tgan yillarda o‘tkazilganlarga nisbatan kengayib, uning faoliyatida mahalliy oliy ta’lim tashkilotlari bilan bir qatorda, AQSH, Yaponiya, Rossiya, Belarus, Tojikiston, Qozog‘iston va boshqa davlatlar iqtisodchi olimlar, ilmiy izlanuvchilari va talabalar ishtirok etdi. Shuningdek, anjuman ishida davlat hokimiyati va boshqaruvi organlari vakillari, xususan, Iqtisodiyot va moliya vazirligi, Vazirlar Mahkamasi huzuridagi Biznes va tadbirkorlik Oliy maktabi mutaxassislari mamlakat moliya tizimini mustahkamlash hamda global moliyaviy munosabatlarni takomillashtirish borasidagi ilmiy ma’ruzalari bilan qatnashdi, — deydi Madinabonu Abdullayeva.
Ta’kidlanishicha, Vazirlar Mahkamasi huzuridagi Biznes va tadbirkorlik oliy maktabi professori Nizomiddin Haydarov 2017—2023-yillarda O‘zbekistonga olib kirilgan kapital haqidagi ma’lumotni ochiqlagan.
2017—2023-yillarda O‘zbekistonda investisiyalar yiliga o‘rtacha 14,5 foizdan o‘sib, jami 1 kvadrillion 460 trillion so‘mdan ortiq kapital qo‘yilmalar amalga oshirilgan. Shu yillarda YAIMning o‘rtacha o‘sishi 5,3 foizni tashkil etib, mazkur o‘sishning 3,9 foizi investisiyalar hisobiga to‘g‘ri kelgan. Investisiyalarning YAIMdagi ulushi 2017-yilda 22,7 foizni tashkil etgan bo‘lsa, 2019-yilda bu eng yuqori daraja – 36,8 foizga yetgan. So‘nggi yillarda investitsiyalar hajmi YAIMga nisbatan barqarorlashib, 2023-yilda 33,0 foizga o‘sgan, — deydi professor Nizomiddin Haydarov bu haqda gapirar ekan.
Bildirilishicha, O‘zbekistonda investitsiya muhitini yaxshilash va tadbirkorlik faoliyatini rivojlantirishga qaratilgan 12 dan ortiq qonunlar, 30 ga yaqin O‘zbekiston Respublikasi prezidentining farmonlari va qarorlari hamda 35 ga yaqin hukumat qarorlari qabul qilingan.
Izoh (0)