Ўзбекистонда инвестициялар йилига ўртача 14,5 фоиздан ўсиб, 2017—2023 йилларда жами 1 квадриллион 460 триллион сўмдан ортиқ капитал қўйилмалар амалга оширилган. Бу ҳақда Тошкент давлат иқтисодиёт университетида “Молия тизимини ривожлантиришнинг замонавий тенденциялари ва истиқболлари” мавзусида бўлиб ўтган халқаро илмий-амалий анжуманда маълум қилинди.
-gxLc53w_.jpg)
Институт катта ўқитувчиси, илмий тадқиқотчи Мадинабону Абдуллаеванинг “Дарё” журналистига билдиришича, анжуманда молиявий тизимни ривожлантириш масалалари муҳокама қилинган.
Анжуманнинг асосий ғояси сифатида “Ўзбекистон – 2030” стратегиясида белгиланган мақсадларга эришиш, молия соҳасидаги устувор йўналишлар бўйича стратегик вазифаларни бажариш, шунингдек, Ўзбекистон Республикаси олий таълим тизимини 2030 йилгача ривожлантириш Концепцияси доирасида олий таълимни модернизация қилиш, илмий салоҳиятини ошириш, таълим ва фанни ривожлантириш йўлида халқаро ҳамкорликни мустаҳкамлаш мақсад қилинган.
Халқаро анжуман географияси ўтган йилларда ўтказилганларга нисбатан кенгайиб, унинг фаолиятида маҳаллий олий таълим ташкилотлари билан бир қаторда, АҚШ, Япония, Россия, Беларусь, Тожикистон, Қозоғистон ва бошқа давлатлар иқтисодчи олимлар, илмий изланувчилари ва талабалар иштирок этди. Шунингдек, анжуман ишида давлат ҳокимияти ва бошқаруви органлари вакиллари, хусусан, Иқтисодиёт ва молия вазирлиги, Вазирлар Маҳкамаси ҳузуридаги Бизнес ва тадбиркорлик Олий мактаби мутахассислари мамлакат молия тизимини мустаҳкамлаш ҳамда глобал молиявий муносабатларни такомиллаштириш борасидаги илмий маърузалари билан қатнашди, — дейди Мадинабону Абдуллаева.
Таъкидланишича, Вазирлар Маҳкамаси ҳузуридаги Бизнес ва тадбиркорлик олий мактаби профессори Низомиддин Ҳайдаров 2017—2023 йилларда Ўзбекистонга олиб кирилган капитал ҳақидаги маълумотни очиқлаган.
2017—2023 йилларда Ўзбекистонда инвестисиялар йилига ўртача 14,5 фоиздан ўсиб, жами 1 квадриллион 460 триллион сўмдан ортиқ капитал қўйилмалар амалга оширилган. Шу йилларда ЯИМнинг ўртача ўсиши 5,3 фоизни ташкил этиб, мазкур ўсишнинг 3,9 фоизи инвестисиялар ҳисобига тўғри келган. Инвестисияларнинг ЯИМдаги улуши 2017 йилда 22,7 фоизни ташкил этган бўлса, 2019 йилда бу энг юқори даража – 36,8 фоизга етган. Сўнгги йилларда инвестициялар ҳажми ЯИМга нисбатан барқарорлашиб, 2023 йилда 33,0 фоизга ўсган, — дейди профессор Низомиддин Ҳайдаров бу ҳақда гапирар экан.
Билдирилишича, Ўзбекистонда инвестиция муҳитини яхшилаш ва тадбиркорлик фаолиятини ривожлантиришга қаратилган 12 дан ортиқ қонунлар, 30 га яқин Ўзбекистон Республикаси президентининг фармонлари ва қарорлари ҳамда 35 га яқин ҳукумат қарорлари қабул қилинган.
Изоҳ (0)