Toshkent viloyati bojxona boshqarmasi ijtimoiy tarmoqlarda “G‘ishtko‘prik” chegara bojxona postida kuzatilayotgan tirbandliklar yuzasidan ma’lumot berdi.
Qayd etilishicha, ayni kunlarda Toshkent viloyati bojxona boshqarmasining “Navoiy” chegara bojxona postida zamonaviy bojxona posti qad rostlayotgani sababli mazkur postning faoliyati vaqtincha to‘xtatilgan. Shu sababli asosiy oqim “G‘ishtko‘prik” chegara bojxona postiga to‘g‘ri kelmoqda.
“G‘ishtko‘prik” chegara bojxona posti orqali bir kunda 30 mingdan 35 ming nafargacha fuqaro va 1000 dan oshiq transport vositasi harakatlanmoqda.
Fuqarolar va transport oqimining yildan yilga ko‘payib borayotganini inobatga olgan holda mazkur postni kengaytirish maqsadida rekonstruksiya ishlari amalga oshirilmoqda. “Chegara bojxona posti butunlay zamonaviy qiyofa kasb etadi. Rekonstruksiya ishlari joriy yilning oktyabr oyida tugatilishi rejalashtirilgan”, — deyiladi xabarda.
2023-yil oktyabr oyida bojxona boshqarmasi “G‘ishtko‘prik” posti kelgusi yilning mart oyida foydalanishga topshirilishini ma’lum qilgandi.
Oldinroq “G‘ishtko‘prik” postidagi bojxonachilar yo‘lovchilarning tovarlarini kiritmayotgani aytilgan xabarlarga munosabat bildirilgan edi. Ta’kidlanishicha, O‘zbekiston davlat chegaralarining avtoyo‘l (piyoda) bojxona chegaralari o‘tish punktlari orqali olib o‘tishda — 300 dollar ekvivalenti miqdoridagi tovarlarni bojsiz olib kirishingiz mumkin.
Izoh (0)