Namangan viloyati Uchqo‘rg‘on tumanida O‘zbekistonni qo‘shni Qirg‘iziston bilan bog‘lovchi chegara postini qurish boshlandi. Bu haqda viloyat hokimligi matbuot xizmati xabar berdi.
Prezident Shavkat Mirziyoyevning Qirg‘izistonga davlat tashrifi chog‘ida ikki mamlakatning hududlararo kelishuvlari amalga oshirilgan hamda unda Namangan va Jalolobod viloyatlari o‘rtasida o‘zaro hamkorlik aloqalarini mustahkamlovchi “yo‘l xaritasi” bitimi imzolangandi.
Viloyat hokimligiga ko‘ra, Uchqo‘rg‘on tumanidagi “Bo‘ston” mahallasining Uchqo‘rg‘on—Madaniyat yo‘lining 10-kilometrida joylashgan “Uchqo‘rg‘on” chegara bojxona posti qurilish jarayonlari qizg‘in kechmoqda.
Taʼkidlanishicha, xuddi shunday loyiha Qirg‘izistonning Novkent tumani Qiziltu qishlog‘i “Kengsay” bojxona postida ham amalga oshirilmoqda.
O‘zbekiston—Qirg‘iziston chegarasida joylashgan “Uchqo‘rg‘on” va “Kengsay” chegara bojxona postlari 2024-yil foydalanishga topshirilishi rejalashtirilgan.
Yanvar oxirlarida Toshkent viloyatidagi “G‘ishtko‘prik” bojxona posti yanada kengaytirilishi to‘g‘risida xabar berilgandi.
Izoh (0)