Ekologiya, atrof-muhitni muhofaza qilish va iqlim o‘zgarishi vazirligi shahar chekkalarida, ochiq hududlarda dam olish holatlari ko‘payib borayotgani sabab fuqarolarga murojaat bilan chiqdi.
Qayd etilishicha, kunlar isib, ochiq hududlarga dam olish uchun borayotgan fuqarolar ko‘paygani ayrim ko‘ngilsiz holatlarga sabab bo‘lmoqda, yaʼni dam olish maskanlarida chiqindilarni tashlab ketish, “Qizil kitob”ga kiritilgan o‘simliklarni uzish, olov yoqish, atrof-muhitni ifloslantirish holatlari ko‘paymoqda.
Shu munosabat bilan vazirlik dam olishga chiqqan fuqarolarni quyidagilarga amal qilishga chaqiradi:
- hosil bo‘lgan maishiy chiqindilarni olib chiqib ketish;
- kul va yonuvchi moddalarni o‘chirish;
- yashil zonalarda o‘simliklarni payhon qilmaslik;
- “Qizil kitob”ga kiritilgan o‘simliklar, jumladan, lolalarni noqonuniy termaslik;
- yovvoyi hayvonlarga duch kelganda ortiqcha harakat qilmaslik, ularga ozor bermaslik.
Yuqoridagi kabi holatlar kuzatilsa, Maʼmuriy javobgarlik to‘g‘risidagi kodeksning tegishli moddalariga asosan jazo choralari qo‘llaniladi.
Dam olish maskanlarida turli ekologik huquqbuzarlik holatlariga duch kelinganida, bu haqda Ekologiya vazirligi (71 207-11-07), Ichki ishlar organlari yoki Milliy gvardiyaga murojaat qilish mumkin.
Ekologiya vazirligi huzuridagi Ekologik ekspertiza markazi direktori o‘rinbosari Adham Qurbonovga ko‘ra, O‘zbekiston aholisi 2023-yilda 40 mingga yaqin ekologik huquqbuzarlik sodir etgan bo‘lib, buning uchun 32 milliard 700 million so‘mlik jarima tayinlangan.
Izoh (0)