Toshkent hayvonot bog‘ida hayvonlarni parvarishlash va davolash xarajatlari o‘sishi munosabati bilan 2-apreldan kirish chiptalari narxi oshirildi. Bu haqda bog‘ matbuot xizmati xabar berdi.
Hayvonot bog‘i ma’muriyati jonivorlarning parvarishi, salomatligi va farovonligi uchun doimo sarmoya kiritishini, biroq bularning barchasi katta moliyaviy investitsiya talab qilishi, ular esa narxlarning o‘sishi bilan ortishini bildirgan.
Endilikda kirish chiptalarining narxi quyidagicha bo‘ladi:
- 7 yoshdan 16 yoshgacha bolalar uchun — 25 ming so‘m (avval 20 ming so‘m);
- 16 yoshdan kattalar uchun — 40 ming so‘m (avval 35 ming so‘m);
- nafaqadagi fuqarolar uchun — 25 ming so‘m (avval 20 ming so‘m);
- xizmat o‘tayotgan harbiylar uchun — 25 ming so‘m (avval 20 ming so‘m);
- imkoniyati cheklangan shaxslar uchun — bepul;
- 7 yoshdan kichik bolalar uchun — bepul.
Bu qaror, shuningdek, chorva yemi narxining oshishi, kommunal xizmatlar (elektr energiyasi, gaz, suv) narxi oshib ketishining o‘rnini qoplash va hayvonlarimizni parvarish qilishni yuqori darajada saqlash zarurati bilan bog‘liq, — deyiladi xabarda.
Eslatib o‘tamiz, 2023-yil 1-aprelda ham Toshkent hayvonot bog‘iga kirish chiptalari uchun narxlar oshirilgandi.
Izoh (0)