Fransiya—O‘zbekiston biznes-forumida 20 dan ortiq bitim va shartnomalar imzolandi

Parijda 11-mart kuni O‘zbekiston va Fransiyaning tegishli vazirliklari, idoralari rahbarlari hamda 100 ga yaqin yetakchi kompaniyalari, moliya va biznes tashkilotlari rahbarlari ishtirokida Fransiya—O‘zbekiston biznes-forumi bo‘lib o‘tdi.

Investitsiyalar, sanoat va savdo vazirligi matbuot xizmatining ma’lum qilishicha, Shavkat Mirziyoyevning Fransiyaga tashrifi arafasida bo‘lib o‘tgan forum yakunlari bo‘yicha qishloq xo‘jaligi, energetika, yashil iqtisodiyot, shaharsozlik, suv taʼminoti va transport, konchilik, sog‘liqni saqlash, taʼlim va boshqa sohalardagi hamkorlikni yanada rivojlantirish va loyihalarni amalga oshirishni belgilab beruvchi 20 dan ortiq bitim va shartnomalar imzolandi.

Tadbirda so‘zga chiqqan investisiyalar, sanoat va savdo vaziri Laziz Qudratov biznes-forumning ikki tomonlama munosabatlarni mustahkamlash va  iqtisodiy hamkorlikni kengaytirishning yangi imkoniyatlarini o‘rganish uchun o‘ziga xos muloqot maydoni sifatidagi ahamiyatini yuqori baholadi. Savdo-iqtisodiy va sarmoyaviy hamkorlikning barqaror dinamikasi qayd etildi.

Laziz Qudratov munosabatlarni chuqurlashtirish uchun foydalanilmagan katta imkoniyatlarga to‘xtalar ekan, hamkorlikni yanada rivojlantirishning qator yo‘nalishlarini, jumladan, transport va logistika jihatidan o‘zaro bog‘liqliqni rivojlantirish, savdo yo‘laklarini diversifikatsiya qilish va geologiya-qidiruv ishlarini olib borish, shuningdek, O‘zbekiston ehtiyojlariga moslashtirilgan fransuz texnologiyalarini joriy etish orqali innovatsion rivojlanish muhimligini taʼkidladi.

Shu bilan birga, investorlar manfaatlariga javob beradigan va mamlakat iqtisodiyotini sifat jihatidan o‘zgartirish va barqarorligini oshirishga qaratilgan yangi qo‘shma tashabbuslarni qo‘llab-quvvatlashga tayyorlik bildirildi.

Forumda so‘zga chiqqan MEDEF International raisi va “Orano” kompaniyasi direktorlar kengashi raisi Klod Imoven O‘zbekistonda amalga oshirilayotgan islohotlarni yuqori baholadi va fransuz biznesi vakillarini O‘zbekiston bozorida faol kirib borishga chaqirdi.

Forum doirasida B2B va G2B formatidagi uchrashuvlar tashkil etilib, ikki mamlakat ishbilarmon doiralariga o‘zaro muloqot qilish va hamkorlikning yangi yo‘nalishlarini o‘rganish uchun yaxshi imkoniyat bo‘ldi.

O‘zbekiston va Fransiya o‘rtasidagi savdo-iqtisodiy hamkorlik

2024-yilda ikki davlat o‘rtasidagi tovar ayirboshlash hajmi 1,1 milliard dollarga yetdi, bu oldingi yilga nisbatan 14 foizga ko‘pdir. Shu bilan birga, O‘zbekistondan Fransiyaga eksport hajmi qariyb ikki baravar ortib, 800 million dollarni, import esa 330 million dollarni tashkil etdi.

Bugungi kunda O‘zbekistonda 50 dan ortiq fransuz kompaniyasi muvaffaqiyatli faoliyat yuritib, rivojlanayotgan ishbilarmonlik muhitiga o‘z hissasini qo‘shmoqda.

O‘zbekistonda energetika, infratuzilma, atrof-muhitni muhofaza qilish, aviatsiya, oziq-ovqat mahsulotlari ishlab chiqarish va turizm sohalarida o‘z tajribasini olib kirayotgan dunyoga mashhur Orano, SUEZ, Veolia, Total Energies, Voltalia, EDF, Lactalis, Airbus, MND va boshqa ko‘plab kompaniyalar bor.

10-mart kuni Parijda “Ilm-fan va taʼlim: O‘zbekiston — Fransiya ko‘prigi” mavzusidagi qo‘shma konferensiya o‘tkazilgani haqida xabar berilgan edi. Unda oliy taʼlim, fan va innovatsiyalar vaziri Qo‘ng‘irotboy Sharipov, Fransiya oliy taʼlim va tadqiqotlar vaziri Filipp Batist, ikki davlatning 30 nafardan ortiq OTMlari rahbarlari ishtirok etdi.