O‘zbekistonda agar 1-maygacha hisob raqam to‘ldirib qo‘yilsa, elektr energiyasi va tabiiy gaz bo‘yicha ikki oy mobaynida eski tarif amal qiladi. Bu haqda Energetika vazirligi matbuot xizmati xabar berdi.
Mutaxassislarning aytishicha, Vazirlar Mahkamasining “Elektr energiyasidan foydalanish qoidalari” haqidagi qaroriga ko‘ra, maishiy iste’molchi o‘z xohishiga ko‘ra, ikki oydan ko‘p bo‘lmagan muddat uchun elektr energiyasidan foydalanish haqini oldindan to‘lab qo‘yishi mumkin va bunda tarif o‘zgarsa ham qiymat qayta hisob-kitob qilinmaydi.
Xuddi shunday me’yor “Tabiiy gazdan foydalanish qoidalari”da ham belgilab qo‘yilgan. Unda, tariflar o‘zgargan hollarda tabiiy gaz hajmi uchun avans tariqasida to‘lovni amalga oshirgan iste’molchi ikki oydan ortiq bo‘lmagan muddatga qo‘shimcha to‘lovlarni amalga oshirishdan ozod qilinishi qayd etilgan.
Masalan, fuqaro elektr energiyasi uchun 30-aprel sanasida 1 million 100 ming so‘m to‘lab qo‘ysa va may oyida 1 000 kVt/soat elektr energiyasi yoqsa, uning shaxsiy hisob raqamidan 200 kVt/soat uchun 59 ming so‘m (295 so‘mdan), 800 kVt/soat uchun esa 472 ming so‘m (590 so‘mdan), jami 531 ming so‘m yechib olinadi. Iyun oyida xuddi shu tartib davom etadi. 1-iyul holatiga 38 ming so‘m pul bilan o‘tadi hamda shu kundan eʼtiboran 1 kVt/soat uchun udan 450 so‘m yechib olina boshlaydi.
“Ammo qarzdor yoki may oyining boshidayoq shaxsiy hisob raqamida mablag‘i tugab, yangi to‘lovni amalga oshirishga majbur bo‘lgan abonentlar uchun tarif o‘zgaradi hamda ular yangi to‘lov bilan tegishli ravishda 450/650 – 1000/1500 so‘mdan haq to‘lashni boshlaydi”, — deyiladi xabarda.
Vazirlar Mahkamasining qaroriga muvofiq, yoqilg‘i-energetika resurslarining 2024–2025-yillarda bosqichma-bosqich o‘zgaradigan yangi narxlari hamda shu yilning 1-may sanasidan eʼtiboran, aholi uchun elektr energiyasi va tabiiy gaz bir oylik isteʼmolining bazaviy meʼyorlari tasdiqlangan.
Izoh (0)