Ўзбекистонда агар 1 майгача ҳисоб рақам тўлдириб қўйилса, электр энергияси ва табиий газ бўйича икки ой мобайнида эски тариф амал қилади. Бу ҳақда Энергетика вазирлиги матбуот хизмати хабар берди.
Мутахассисларнинг айтишича, Вазирлар Маҳкамасининг “Электр энергиясидан фойдаланиш қоидалари” ҳақидаги қарорига кўра, маиший истеъмолчи ўз хоҳишига кўра, икки ойдан кўп бўлмаган муддат учун электр энергиясидан фойдаланиш ҳақини олдиндан тўлаб қўйиши мумкин ва бунда тариф ўзгарса ҳам қиймат қайта ҳисоб-китоб қилинмайди.
Худди шундай меъёр “Табиий газдан фойдаланиш қоидалари”да ҳам белгилаб қўйилган. Унда, тарифлар ўзгарган ҳолларда табиий газ ҳажми учун аванс тариқасида тўловни амалга оширган истеъмолчи икки ойдан ортиқ бўлмаган муддатга қўшимча тўловларни амалга оширишдан озод қилиниши қайд этилган.
Масалан, фуқаро электр энергияси учун 30 апрель санасида 1 миллион 100 минг сўм тўлаб қўйса ва май ойида 1 000 кВт/соат электр энергияси ёқса, унинг шахсий ҳисоб рақамидан 200 кВт/соат учун 59 минг сўм (295 сўмдан), 800 кВт/соат учун эса 472 минг сўм (590 сўмдан), жами 531 минг сўм ечиб олинади. Июнь ойида худди шу тартиб давом этади. 1 июль ҳолатига 38 минг сўм пул билан ўтади ҳамда шу кундан эътиборан 1 кВт/соат учун удан 450 сўм ечиб олина бошлайди.
“Аммо қарздор ёки май ойининг бошидаёқ шахсий ҳисоб рақамида маблағи тугаб, янги тўловни амалга оширишга мажбур бўлган абонентлар учун тариф ўзгаради ҳамда улар янги тўлов билан тегишли равишда 450/650 – 1000/1500 сўмдан ҳақ тўлашни бошлайди”, — дейилади хабарда.
Вазирлар Маҳкамасининг қарорига мувофиқ, ёқилғи-энергетика ресурсларининг 2024–2025 йилларда босқичма-босқич ўзгарадиган янги нархлари ҳамда шу йилнинг 1 май санасидан эътиборан, аҳоли учун электр энергияси ва табиий газ бир ойлик истеъмолининг базавий меъёрлари тасдиқланган.
Изоҳ (0)