Enter Engineering ishchilari maosh yo‘qligi sabab ishlashda davom etishdan bosh tortayotgani, 2023-yildan beri maoshini ololmayotgan ishchilar shu tarzda noroziligini namoyish qilayotgani xabar berilgandi.
Kompaniya mas’ullarining bayonot berishicha, ishchilarga 2024-yilning fevral oyi uchun ham maosh to‘langan. Mart oyi uchun maosh to‘lab berish jarayonlari davom etmoqda.
Xodimlarning ish haqi bevosita buyurtmachi oldida bajarilgan ish hajmining muvaffaqiyatli asoslab berilishiga to‘g‘ridan to‘g‘ri bog‘liq. Shunga ko‘ra, hozirgi kunda xodimlarning fevral oyi uchun maoshlari to‘liq to‘lab berilgan. Ayni vaqtda mart oyi uchun hajmlarni asoslash jarayoni ketmoqda, ularning yakuniga ko‘ra, butun ish haqi to‘lab beriladi. Ya’ni shunday tartib borki, unga ko‘ra, avvaliga qurilish obyektlarida oldingi oyda bajarilgan ishlar hajmi buyurtmachi oldida himoyalanishi kerak. Aynan himoya qilingan hajmlar ish haqini baholash uchun asos bo‘lib xizmat qiladi. So‘ngra soliqlarni hisoblash va hisobotlarni topshirish, shuningdek, xodimlarga to‘liq maosh berish jarayonlari sodir bo‘ladi. Bularning hammasi vaqtni talab qiladi.
Ushbu mexanizmga ko‘ra, ayni vaqtda Enter Engineering kompaniyasida xodimlarga mart oyi uchun ish haqini to‘lash jarayoni ketmoqda. Bu, birinchi navbatda, qurilish kompaniyasining o‘zi, qolaversa, sifat nazorati xizmatlari va buyurtmachining mustaqil texnik nazorati xizmatlari tomonidan tekshirilishi kerak bo‘lgan qurilish ishlarining o‘ziga xos xususiyatlari bilan bog‘liq, — deyiladi kompaniyaning Telegram’dagi rasmiy kanalida tarqalgan xabarda.
Bildirilishicha, ijtimoiy tarmoqlarda tarqalayotgan videolar uch yil oldingi feyk videolar hisoblanadi.
Real faktlarga asoslanmagan ushbu lavhalarni tarqatmasligingizni so‘rab qolamiz. Shuningdek, kompaniya ham, buyurtmachilar ham xodimlari oldidagi barcha majburiyatlarini bajarib kelishini alohida aytib o‘tmoqchimiz, — deydi mas’ullar.
Kompaniyaning bu ma’lumoti bilan tanishgan ishchilar mas’ullar yolg‘on gapirib, vaziyatdan chiqishga urinayotganini aytmoqda.
Bu yolg‘on, shunchaki vaziyatdan chiqish uchun aytilayotgan ma’lumot. Bizda 2023-yilning noyabr oyi uchun ham maosh olmaganlar bor. 2024-yilning yanvar, fevral oyi haqida gapirmasak ham bo‘ladi, — deydi bu haqda tahririyatga gapirgan suhbatdosh.
Yana bir ishchining ma’lum qilishicha, bugungi to‘polonlar sabab mas’ullar ko‘pchilikka tahdid qilib, ishdan bo‘shatish bilan ham qo‘rqitgan.
Telegram’da Shohrux Ergashov nomi bilan ishchilarning biriga yozgan mas’ul maosh so‘rab, to‘polon qilganlarni “poda” deb nomlab, ishchiga ularga qo‘shilmaslikni maslahat beradi.
“Niyat qanaqa? Ishlashmi yoki ‘uvolneniya’ ”, deya savol bergan u ishchilarning biriga Telegram orqali xabar yozar ekan. Ishchi esa to‘g‘ri yo‘lda ekanini, ishdan bo‘shatishsa ham, ko‘chada ish ko‘pligini ta’kidlaydi.
Izoh (0)