Prezident Donald Tramp ma’muriyati AQSH vizasiga ega 55 milliondan ortiq xorijlikni noqonuniy harakatlar sodir etganini tekshirish yuzasidan doimiy tekshiruv ostiga oldi. Bu haqda Associated Press xabar berdi.
Davlat departamentining ma’lum qilishicha, har qanday qonunbuzarlik aniqlansa, vizalar bekor qilinadi, agar shaxs AQSHda bo‘lsa, u deportatsiya qilinadi.
“Tekshiruv davomida barcha mavjud ma’lumotlar, jumladan, huquqni muhofaza qilish va immigratsiya yozuvlari ham ko‘rib chiqiladi”, deyiladi department bayonotida.
Donald Tramp o‘zining ikkinchi prezidentlik muddatida mamlakatdagi noqonuniy migrantlar va vaqtinchalik vizaga ega shaxslarni deportatsiya qilishga alohida e’tibor qaratmoqda. Davlat departamentining ta’kidlashicha, Trampning inauguratsiya kunidan beri vizalar bekor qilinishi 2024-yilga nisbatan ikki barobar oshgan, xususan talabalarga viza berish 4 barobar kamaygan.
Davlat kotibi Marko Rubio tijoriy yuk mashinalari (trak) haydovchilari uchun ishchi viza berish zudlik bilan to‘xtatilishini ma’lum qilgan.
“AQSH yo‘llarida ko‘plab xorijiy haydovchilar xavfsizlikka tahdid solayotganiga guvoh bo‘lyapmiz. Ular amerikalik haydovchilarning ish o‘rinlarini olib qo‘ymoqda”.
Migratsiya Siyosati instituti mutaxassisi Julia Gelat esa bu tekshiruvlarning samaradorligiga shubha bildirib, shunday dedi:
“Ushbu 55 million raqam sayyohlik vizasiga ega odamlarni ham o‘z ichiga oladi”.
Yangi qoidalar doirasida barcha viza egalari, shu jumladan ularning ijtimoiy tarmoqlari va hujjatlari diqqat bilan o‘rganiladi.
“Bizning maqsadimiz — AQSH milliy va jamoat xavfsizligini himoya qilish”, deyiladi davlat departamenti bayonotida.
Odatda AQSHga kelmoqchi bo‘lgan xorijliklarning aksariyatidan, ayniqsa uzoq muddat o‘qish yoki ishlashni maqsad qilganlardan viza olish so‘raladi. Qisqa muddatli sayyohlik yoki biznes tashriflari uchun 40 ta Yevropa va Osiyo mamlakatlari fuqarolaridan viza talab qilinmaydi. Ular tegishli hujjat olmasdan Qo‘shma Shtatlarda 3 oygacha qolishi mumkin. Ayni paytda, dunyo mamlakatlarining aksariyati, jumladan, Xitoy, Hindiston, Indoneziya, Rossiya va Afrika kabi davlatlardan keladigan shaxslar AQSHga sayohat qilish uchun viza olishlari va ariza topshirishlari kerak.
Hafta boshida AQSH Davlat departamenti mahalliy, shtat va federal qonunlarni buzganlik uchun 6 mingdan ortiq talabalar vizasini bekor qilganini ma’lum qilgandi. Ularning aksariyati zo‘ravonlik, mast holda yoki giyohvand moddalar ta’sirida mashina haydash va terrorizmni qo‘llab-quvvatlashda ayblangan.
Izoh (0)