AQSH 6 mingdan ortiq xalqaro talaba vizasini bekor qildi

AQSH Davlat departamenti 6 mingdan ortiq xalqaro talaba vizasini bekor qildi. Bu qonun buzilishlari va muddat tugaganidan keyin ham mamlakatda qolish holatlari ko‘paygani bilan izohlanmoqda. Bu haqda BBC xabar berdi.

Departament ma’lumotlariga ko‘ra, vizalarning katta qismi qonunbuzarliklar — tajovuz, mast holda mashina haydash, o‘g‘irlik hamda terrorizmga yordam kabi sabablar bilan bekor qilingan.

Qaror AQSH prezidenti Donald Tramp ma’muriyati immigratsiya va xalqaro talabalar bo‘yicha nazoratni kuchaytirayotgan bir paytda e’lon qilinmoqda. Rasmiylar terrorizmga yordam deganda nimani nazarda tutayotganini aniq ochiqlamagan, biroq hukumat Falastinni qo‘llab-quvvatlab namoyish uyushtirgan ayrim talabalarni ham nishonga olgani, ularning xatti-harakatlarini antisemitizm sifatida baholagani aytilmoqda.

6 mingdan ortiq bekor qilingan vizalarning qariyb 4 mingtasi qonunbuzarliklar bilan bog‘liq. Yana 200–300 ta viza esa “INA 3B” moddasi ostida (inson hayotiga xavf tug‘diruvchi yoki AQSH qonunlarini buzuvchi terroristik faoliyatda ishtirok etganlik) bekor qilingan.

Tramp ma’muriyati oldinroq dunyo bo‘ylab AQSH elchixonalarida xalqaro talabalar uchun viza uchrashuvlarini vaqtincha to‘xtatgan edi. Iyun oyida jarayon qayta boshlangach, arizachilar o‘zlarining ijtimoiy tarmoqlardagi akkauntlarini ommaga ochib qo‘yishlari talab qilingan. Rasmiylar bu orqali AQSH fuqarolari, madaniyati, hukumati va tamoyillariga qarshi har qanday dushmanlik belgilarini aniqlashni maqsad qilgan. Davlat departamenti xodimlariga, shuningdek, xorijiy terrorchi guruhlarni qo‘llab-quvvatlaydigan yoki AQSH milliy xavfsizligiga tahdid soluvchi shaxslarni aniqlash bo‘yicha ko‘rsatmalar berilgan.

Davlat kotibi Marko Rubio may oyida minglab talaba vizalari qaytarib olinganini ma’lum qilgandi Unga ko‘ra, bu jarayon yana davom etadi. Demokratlar esa Tramp ma’muriyatining bu choralarini tanqid qilib, ularni talabalarning huquqlarini poymol qilish deb baholamoqda.

Open Doors tashkiloti ma’lumotlariga ko‘ra, 2023/2024-o‘quv yilida AQSHdagi oliy ta’lim muassasalarida 210 dan ortiq davlatdan 1,1 milliondan ko‘proq xalqaro talaba ta’lim olgan. Bu umumiy talabalik kontingentining taxminan 6 foizini tashkil etadi.