AQSH prezidenti Donald Tramp ma’muriyati ushlab olingan muhojirlarni Luiziana shtatidagi “Angola” qamoqxonasiga yuborish niyatida ekanligini bildirdi. Bu haqda The Wall Street Journal (WSJ) gazetasi o‘z manbalariga asoslanib e’lon qildi.
Ma’lum qilinishicha, hukumat ushbu muassasada mahbuslar uchun taxminan 450 ta o‘rin ajratilishini kutmoqda, reja esa sentyabr oyi boshida amalga oshirilishi ko‘zda tutilgan.
“Angola” AQSHdagi eng yirik qattiq tartibli qamoqxona hisoblanadi va ilgari mamlakatdagi eng “qonli” qamoqxonalardan biri sifatida tanilgan edi.
WSJ yozishicha, muhojirlarni Luizianaga joylashtirish AQSHga noqonuniy muhojirlar uchun yangi markaz qurishga ketadigan mablag‘ni tejash imkonini beradi. Gazeta ta’kidlashicha, agar loyiha amalga oshsa, muhojirlar mahbuslarning 70 foizdan ortig‘i zo‘ravonlik jinoyatlari uchun hukm qilingan muassasada jazoni o‘tashga majbur bo‘ladi.
AQSH Immigratsiya va bojxona nazorati xizmati (ICE) 200 dan ortiq muhojirlarni vaqtincha saqlash markazlarini boshqaradi. 4-iyul kuni Tramp ushlab turilgan muhojirlarni saqlash xizmati imkoniyatlarini kengaytirish uchun 45 milliard dollar ajratishni nazarda tutuvchi davlat xarajatlari to‘g‘risidagi qonunni imzoladi.
Bundan avval AQSH prezidenti Donald Tramp Savdo vazirligiga mamlakat aholisini qayta ro‘yxatga olish borasida topshiriq bergandi. Unga ko‘ra, endilikda Qo‘shma Shtatlarda noqonuniy yashayotgan migrantlar ro‘yxatga kiritilmaydi.
Izoh (0)