BMT Bosh assambleyasi doirasida Rossiya va O‘zbekiston tashqi ishlar vazirlari uchrashuvi bo‘lib o‘tdi. Bu haqda Baxtiyor Saidov o‘z Telegram kanalida maʼlum qildi.
“Madaniyatlararo va dinlararo muloqot orqali barqaror rivojlanish uchun tinch va inklyuziv jamiyatlar yaratishga ko‘maklashish” mavzusida yuqori darajadagi panel muhokamalari o‘tkazilgan.
“BMT Sivilizatsiyalar alyansi, barcha maʼruzachilar va ishtirokchilarga ko‘rsatgan ko‘magi uchun minnatdorlik bildiramiz. O‘zbekistonning umumiy xavfsizlik va farovonlik manfaatlari yo‘lida tinchlik, muloqot va inklyuzivlik madaniyatini ilgari surish bo‘yicha qatʼiy intilishini yana bir bor tasdiqlaymiz”, deydi vazir.
Shuningdek, strategik sherikligimizning dolzarb mavzulari, shuningdek, bo‘lajak oliy va yuqori darajadagi tadbirlarga tayyorgarlik ko‘rish yuzasidan atroflicha suhbat o‘tkazilgan. Anʼanaga ko‘ra, hamkorlik kun tartibi keng bo‘lib, barcha sohalarni qamrab olgan.
“O‘zaro ishonchni mustahkamlash yo‘lida davlatlar bir-birlarining ichki ishlariga aralashmaslik tamoyiliga amal qilish muhimligi taʼkidlandi. Biz ittifoqchilik ruhidagi doimiy muloqotimizni davom ettirishga kelishib oldik”, deydi Baxtiyor Saidov.
O‘zi nima gap?
Toshkentning Chilonzor tumanidagi 188-maktabda rus tili fani darsida o‘qituvchi 6-sinf o‘quvchisini urdi. Holat aks etgan video ijtimoiy tarmoqlarda tarqalib, keng muhokamalarga sabab bo‘ldi. Facebook’dagi “Potrebitel.uz” guruhida yozilishicha, o‘qituvchi rus sinfiga darsni o‘zbek tilida o‘tgan. O‘quvchi darsni rus tilida o‘tishni so‘ragan. Shundan so‘ng videoda aks etgan holat yuz bergan.
Rossiya TIV munosabati
Rossiya Tashqi ishlar vazirligi rasmiy vakili Mariya Zaxarova O‘zbekistondan yuz bergan hodisaga huquqiy baho berishni va bolaga nisbatan shafqatsizlik qilgan aybdorga qarshi choralar ko‘rish so‘ralganini aytdi.
“Bu masalani diqqat-e’tiborimiz markazida tutamiz”, degan Rossiya Tashqi ishlar vazirligi rasmiysi.
Toshkent shahar maktabgacha va maktab ta’limi boshqarmasi matbuot xizmatining ma’lum qilishicha, bolani urgan ayol sinov muddati bilan maktabga ishga taklif qilingan, videodagi voqea uning dastlabki ish kunida kuzatilgan. Voqeadan xabar topgan o‘quvchining ota-onasi huquq-tartibot idoralariga murojaat qilgan. Ayni paytda surishtiruv ishlari olib borilmoqda.
O‘qituvchining boshqa huquqbuzarliklari
Shu bilan birga, ushbu ayol boshqa bir qancha huquqbuzarliklar sodir etgani aniqlangan. Qizi o‘qiydigan boshqa maktabda maktab direktori o‘rinbosari bo‘lgan ayolga jismoniy kuch ishlatgan, Milliy gvardiya va IIO xodimlariga nisbatan g‘ayriijtimoiy munosabatda bo‘lib, ularining qonuniy talablarini bajarmasdan keskin qarshilik ko‘rsatgan.
Bunday qilmishi uchun unga 25-sentyabr kuni 7 sutka ma’muriy qamoq jazosi, BHMning 3 baravari (1 020 000 so‘m) va BHMning 7 baravari (2 380 000 so‘m) miqdorida jarima jazosi tayinlangan.
Alisher Qodirov Mariya Zaxarovaga javob qaytardi
Alisher Qodirov Rossiya Tashqi ishlar vazirligi rasmiy vakili Mariya Zaxarova Toshkentdagi maktabda o‘qituvchi o‘quvchini urgani yuzasidan O‘zbekistondan tushuntirish so‘raganiga munosabat bildirdi.
Unda bola huquqi O‘zbekiston maktabida, O‘zbekiston fuqarosining bolasiga nisbatan buzilganini va chorasi O‘zbekiston xalqi nomidan qabul qilingan qonunlar asosida ko‘rilishini ta’kidladi.“Bizning ichki ishlarimiz haqida bosh qotirguncha muammolarga to‘la o‘zlarining ishlari bilan shug‘ullanishsa, to‘g‘ri bo‘lar edi. Tekis joyda to‘polondan foyda chiqmasligini tushunib yetishdi, degan xulosaga ertaroq shekilli”, dedi “Milliy tiklanish” partiyasi deputati Alisher Qodirov.
Mariya Lvova-Belova: O‘zbekistonda rusiyzabon o‘quvchining kaltaklanishi bo‘yicha favqulodda vaziyat ko‘rib chiqilmoqda
Rossiya bolalar ombudsmani Mariya Lvova-Belova o‘zbekistonlik hamkasbi Surayyo Rahmonova bilan aloqada ekanini aytdi.
“Rus tilida so‘zlashuvchi o‘quvchining kaltaklanishi bilan bog‘liq vaziyat uning nazoratida. Hamkasb mamlakat Ichki ishlar vazirligi, Maktabgacha va maktab ta’limi vazirligiga so‘rov yuborgan. Chilonzor tumani IIB tomonidan tergovga qadar tekshiruv o‘tkazilmoqda”, deydi Lvova-Belova o‘zining Telegram kanalida.
Xalqaro jinoiy sud 2023-yil 17-mart kuni Mariya Lvova-Belovani hibsga olishga order bergandi. U Rossiya prezidenti Vladimir Putin bilan birga Ukrainaning bosib olingan hududlaridan bolalarni Rossiyaga noqonuniy ravishda deportatsiya qilishda ayblanmoqda.
Rossiya Toshkentdagi maktabda bolani kaltaklagan o‘qituvchiga mamlakatga kirishni taqiqlamoqchi
“Rossotrudnichestvo” rasmiylardan Toshkentdagi maktabda o‘quvchini kaltaklagan o‘qituvchining Rossiyaga kirishini taqiqlash imkoniyatini ko‘rib chiqishni so‘raydi. Bu haqda agentlik rahbari Yevgeniy Primakov xabar berdi.
Izoh (0)