Hindistonning Jammu shahrida politsiya mahalliy temiryo‘l vokzalini portlatish tahdidi yozilgan xatni oyog‘iga bog‘langan kaptarni qo‘lga oldi. Bu haqda The Indian Express xabar bermoqda.
Huquq-tartibot idoralari ma’lumotlariga ko‘ra, qush 18-avgust kuni kechqurun Pokiston bilan chegaradosh Katmariya tumanida ushlangan. Urdu va ingliz tillaridagi xatda Kashmir Freedom (Kashmir ozodligi) va Time has come (Vaqt keldi) so‘zlari, shuningdek, portlovchi qurilma yordamida vokzalni portlatish rejalashtirilgani haqida ogohlantirish mavjud edi.
Manbalarning ta’kidlashicha, bu tahdid aynan kaptar orqali yetkazilgan ilk hodisa hisoblanadi. Ilgari Pokiston tomonidan turli xabarlar bitilgan havo sharlari, bayroqlar va qushlar uchirilgan.
Kuch tuzilmalari xavfsizlik choralarini kuchaytirgan. Vokzal va temiryo‘llarni qo‘riqlashga kinologlar va sapyorlar jalb etilgan, politsiya kuchaytirilgan tayyorgarlik holatiga o‘tkazilgan. Mutaxassislar bu kimningdir hazilimi yoki puxta rejalashtirilgan fitnaning bir qismi ekanligini tekshirmoqda.
Ekspertlarning fikricha, kabutar bunday xabarlarni yetkazish uchun maxsus o‘rgatilgan bo‘lishi mumkin. Shunday bo‘lsa-da, hokimiyat bunday holatlarga juda jiddiy yondashishga majbur.
Izoh (0)