Hindistonning Kashmir mintaqasida 14-avgustdagi kuchli yomg‘ir va sel 46 kishining umriga zomin bo‘ldi, 200 dan ortiq odam bedarak yo‘qoldi. Bu haqda CNN xabar berdi.
Ma’lum qilinishicha, hodisa Kishtvar tumanidagi Chasoti shaharchasida, mashhur Machail Mata ziyorat yo‘lida yuz bergan. Sel oqimi ziyoratchilar uchun qurilgan jamoat oshxonasini va xavfsizlik posti joylashgan hududni yuvib ketgan. Bu vaqtda ko‘plab ziyoratchilar tushlikka yig‘ilgan bo‘lib, kuchli oqim ularni ham oqizib ketgan.
Kishtvar tuman komissari Ramesh Kumarga ko‘ra, voqea mahalliy vaqt bilan soat 11:30 da yuz bergan. Hodisa joyiga politsiya, qutqaruv xizmatlari, armiya va havo kuchlari jalb etilgan. Qutqaruv ishlari hamon davom etmoqda. Jammu va Kashmir mintaqasi meri Omar Abdulloh hodisaga shunday munosabat bildirdi:
“Bu og‘ir va achchiq xabar. Hodisa joyidan aniq ma’lumotlar sekin-asta yetib kelmoqda”.
Hindiston meteorologiya xizmati sel (bir soat ichida 100 millimetrdan ortiq yog‘in) tog‘li hududlarda to‘satdan ko‘chki va vayronalarga olib kelganini bildirgan. Shu bois Kashmirning bir nechta hududlarida, jumladan, Kishtvarda aholiga xavfli inshootlar, elektr ustunlari va eski daraxtlardan uzoqda bo‘lish tavsiya qilinmoqda.
Ma’lumot o‘rnida, Machail Mata, rasman “Machail Chandi Mata Temple” deb ataladi. U Hindistonning Jammu va Kashmir mintaqasida, Kishtvar tumani, Paddar vodiysidagi Machail qishlog‘ida joylashgan. Bu yer dengiz sathidan taxminan 2 800 metr balandlikda bo‘lib, tog‘ bilan o‘ralgan.
Izoh (0)