Toshkent-Markaziy vokzalida chiptalar haqiqiyligini tekshiruvchi turniketlar ishga tushdi. Bu haqda “O‘ztemiryo‘lyo‘lovchi” matbuot xizmati xabar berdi.
Maʼlum qilinishicha, ushbu turniketlar elektron chiptalardagi QR-kodni skaner qilib, chipta haqiqiy bo‘lsa, yo‘lovchini perronga chiqishga ruhsat beradi. Soxta yoki qaytarilgan chiptaga ega bo‘lgan yo‘lovchilarga esa poyezdga chiqishga taʼqiq o‘rnatadi.
Yil oxirigacha chiptaxonalardan rasmiylashtiriladigan chiptalar ham elektron ko‘rinishga o‘tishi rejalashtirilgan.
Bundan avval O‘zbekistonda poyezdlar uchun chiptalar narxi oshirila boshlangani haqida xabar berilgandi. 2018-yildan beri chiptalar narxi o‘zgarmagan edi. Shu bilan birga, oylik ish haqi 350 foizga, elektr energiyasi 800 foizga, vagonlarning ta’mirlash sarf-xarajatlari 180 foizga va boshqa xarajatlar 520 foizga oshgan. Chiptalar narxi ko‘p yillar davomida o‘zgarmagan bo‘lsa-da, vagonlar ishlab chiqarish, ularga xizmat ko‘rsatish va boshqa xizmatlar narxi sezilarli darajada oshgan.
Narxlar qanchaga oshirildi?
O‘zbekistonda 2024-yil 20-yanvardan boshlab yuqori tezlikda harakatlanuvchi “Afrosiyob” elektropoyezdlari hamda “Sharq”, “Nasaf” va “O‘zbekiston” tezyurar poyezdlarining chiptalar narxi 20 foizga oshgandi. 15-maydan boshlab esa yuqori tezlikda harakatlanuvchi “Afrosiyob” elektropoyezdlarining chiptalar narxi ekonom klass 20 foiz, biznes klass 30 foiz va VIP klass 40 foiz miqdorda oshgan.
“O‘zbekiston temir yo‘llari” AJ 2024-yilning 1-iyuldan mahalliy yo‘nalishlardagi yo‘lovchi poyezdlar — “Nasaf”, “Sharq”, “O‘zbekiston” poyezdlari chipta narxlarining tarif qismi 25 foizga oshirilishini maʼlum qildi.
“O‘zbekiston termi yo‘llari” AJ rasmiy xabarida 2023—2024-yillar davomida yo‘lovchi tashish bilan shug‘ullanuvchi “O‘ztemiryo‘lyo‘lovchi” AJ daromadlari 130 foizga oshgani va xarajatlar 125 foizga kamaygani ko‘rsatilgan.
Izoh (0)