Тошкент-Марказий вокзалида чипталар ҳақиқийлигини текширувчи турникетлар ишга тушди. Бу ҳақда “Ўзтемирйўлйўловчи” матбуот хизмати хабар берди.
![](/static/2024/09/09/chipta-Z-iwmci6.jpg)
Маълум қилинишича, ушбу турникетлар электрон чипталардаги QR-кодни сканер қилиб, чипта ҳақиқий бўлса, йўловчини перронга чиқишга руҳсат беради. Сохта ёки қайтарилган чиптага эга бўлган йўловчиларга эса поездга чиқишга таъқиқ ўрнатади.
Йил охиригача чиптахоналардан расмийлаштириладиган чипталар ҳам электрон кўринишга ўтиши режалаштирилган.
Бундан аввал Ўзбекистонда поездлар учун чипталар нархи оширила бошлангани ҳақида хабар берилганди. 2018 йилдан бери чипталар нархи ўзгармаган эди. Шу билан бирга, ойлик иш ҳақи 350 фоизга, электр энергияси 800 фоизга, вагонларнинг таъмирлаш сарф-харажатлари 180 фоизга ва бошқа харажатлар 520 фоизга ошган. Чипталар нархи кўп йиллар давомида ўзгармаган бўлса-да, вагонлар ишлаб чиқариш, уларга хизмат кўрсатиш ва бошқа хизматлар нархи сезиларли даражада ошган.
Нархлар қанчага оширилди?
Ўзбекистонда 2024 йил 20 январдан бошлаб юқори тезликда ҳаракатланувчи “Афросиёб” электропоездлари ҳамда “Шарқ”, “Насаф” ва “Ўзбекистон” тезюрар поездларининг чипталар нархи 20 фоизга ошганди. 15 майдан бошлаб эса юқори тезликда ҳаракатланувчи “Афросиёб” электропоездларининг чипталар нархи эконом класс 20 фоиз, бизнес класс 30 фоиз ва VIP класс 40 фоиз миқдорда ошган.
“Ўзбекистон темир йўллари” АЖ 2024 йилнинг 1 июлдан маҳаллий йўналишлардаги йўловчи поездлар — “Насаф”, “Шарқ”, “Ўзбекистон” поездлари чипта нархларининг тариф қисми 25 фоизга оширилишини маълум қилди.
“Ўзбекистон терми йўллари” АЖ расмий хабарида 2023—2024 йиллар давомида йўловчи ташиш билан шуғулланувчи “Ўзтемирйўлйўловчи” АЖ даромадлари 130 фоизга ошгани ва харажатлар 125 фоизга камайгани кўрсатилган.
Изоҳ (0)