Toshkentda tun-u kun ishlaydigan ko‘chalar soni yana ko‘paytiriladi

Toshkent shahrida tun-u kun ishlaydigan gavjum ko‘chalar soni oshiriladi. Bu masala 7-fevral kuni xizmat ko‘rsatish sohalarini rivojlantirish bo‘yicha asosiy vazifalar muhokamasi yuzasidan Shavkat Mirziyoyev raisligidagi videoselektor yig‘ilishida ko‘rib chiqildi.

So‘nggi yillarda tungi iqtisodiyotni rivojlantirishga katta e’tibor qaratilmoqda. Yig‘ilishda Olmazor tumanidagi 17 ta ko‘chadan o‘tgan 7,3 kilometr uzunlikdagi yo‘lni gastronomik ko‘chaga aylantirish loyihasi ma’qullandi. Ushbu ko‘chada 250 ta savdo va servis obyektlari tashkil qilinib, kamida 1,5 ming ish o‘rni yaratiladi.

Poytaxtdagi yana 26 ta ko‘chani tun-u kun ishlaydigan gavjum ko‘chaga aylantirish, 24 soat ishlaydigan savdo nuqtalarini 1 mingtaga ko‘paytirish mumkinligi ko‘rsatib o‘tildi.

Turistlar bildirgan fikrlarni inobatga olib, turizm va servis joylarini kechqurun ham ishlaydigan qilish kerakligi ta’kidlandi.

Toshkent ko‘chalarida jozibador va serqatnov turizm hamda xizmat ko‘rsatish infratuzilmasini yaratish maqsadida 24/7 rejimda ishlovchi ko‘ngilochar ko‘cha tashkil etish belgilangan. Toshkent shahar hokimligi 2024-yil mart oyida Yashnobod tumanida birinchi gastronomik ko‘chani tashkil etish borasidagi rejalari bilan bo‘lishgandi. O‘shanda poytaxtning sakkizta tumani hududida hunarmandlar va gastroturizm uchun zonalar yaratilishi aytilgan edi.