Ijtimoiy himoya milliy agentligi va A.I.Gersen nomidagi Rossiya davlat pedagogika universiteti o‘rtasida o‘zaro anglashuv va hamkorlik memorandumi imzolandi. Bu haqda agentlik matbuot xizmati xabar berdi.

Ma’lum qilinishicha, agentlik rahbariyati va universiteti rektori Sergey Valentinovich Tarasov o‘rtasida uchrashuv o‘tkazilib, unda tomonlar inklyuziv va korreksion taʼlim sohasida malakali mutaxassislarni tayyorlash istiqbollarini muhokama qildi. Surdopedagogika, tiflopedagogika, logopediya va oligoefrenopedagogika kabi asosiy yo‘nalishlarni rivojlantirishga alohida eʼtibor qaratildi. Rossiya davlat pedagogika universiteti o‘zining ko‘p yillik tajribasi va ilmiy salohiyati bilan o‘quv dasturlarini ishlab chiqish, pedagoglarning malakasini oshirish hamda inklyuziv taʼlimning xalqaro standartlarini joriy etishda faol ishtirok etadi.

Hamkorlik yo‘nalishlaridan biri sifatida jismoniy imkoniyati cheklangan shaxslarni ijtimoiy integratsiya qilishning samarali vositasi sifatida adaptiv jismoniy tarbiya va sportni rivojlantirish masalasi muhokama qilindi. O‘tgan yili O‘zbekistonda Adaptiv sport turlari assotsiatsiyasi tashkil etilgani va universitet bu sohada mutaxassislar tayyorlashga katta hissa qo‘shishi mumkinligi taʼkidlandi. Xususan, Toshkentdagi universitet filiali adaptiv sport bo‘yicha alohida fakultet ochish rejalashtirilmoqda. Ushbu fakultet jismoniy nogironligi bor yoshlarga ishlovchi murabbiy va metodistlarni tayyorlash markaziga aylanishi kutilmoqda.

Taʼlim yo‘nalishlaridan tashqari, tomonlar bitiruvchilarning kasbiy moslashuvi masalasini ham muhokama qildi. Shu munosabat bilan agentlik stajirovka o‘tash imkoniyatlarini yaratish va mutaxassislarni ishga joylashtirishda ko‘maklashishga tayyorligini bildirdi. Qayd etilishicha, bu bitiruvchilarning mehnat bozoriga samarali integratsiya qilinishiga xizmat qiladi.

Rossiya davlat pedagogika universitetining Toshkentdagi filialida adaptiv sport bo‘yicha alohida fakultet ochilishi haqida 13-fevral kuni Shavkat Mirziyoyev raisligida bo‘lib o‘tgan videselektor yig‘ilshida ham qayd etib o‘tilgandi.

Majlisda Adaptiv sport turlari assosiatsiyasi A.I.Gersen nomidagi Rossiya davlat pedagogika universiteti bilan hamkorlikda nogironligi bo‘lgan yoshlarni sport bilan qamrab olish bo‘yicha ilmiy asoslangan metodika va standartlarni ishlab chiqishi, universitetning Toshkentdagi filialida adaptiv sport bo‘yicha alohida fakultet ochilishi ma’lum qilingan.

Davlat rahbari nogironligi bo‘lgan shaxslarni sportchi qilib tayyorlashda ilmga asoslangan metodika, standartlar, o‘quv adabiyotlari yetishmasligi, sodda qilib aytganda, sog‘lom sportchilar uchun talablar shunday ko‘chirilib qo‘yilgani sababli bu sohada “katta sakrash” bo‘lmayotganini ta’kidlab o‘tgandi. Shu bois har yili kamida 100 nafar nogironligi bo‘lgan sportchilar va ularning murabbiylari malaka oshirish uchun xorijga yuboriladi. Shuningdek, hududlardagi 39 ta sport maktabi parasport turlariga ixtisoslashadi.

O‘zbekistonda adaptiv sportni rivojlantirish

Shavkat Mirziyoyev Parijdagi Paralimpiya o‘yinlarida O‘zbekiston sharafini himoya qilgan sportchilar, ularning ota-onalari va murabbiylari bilan o‘tkazgan uchrashuvida mamlakatda imkoniyati cheklangan shaxslarni qo‘llab-quvvatlash, ularga inklyuziv sharoit yaratish bo‘yicha ulkan ishlar amalga oshirilayotganini aytgandi.

Adaptiv sportni rivojlantirish hamda nogironligi bo‘lgan shaxslarni sportning ushbu yo‘nalishiga jalb etish maqsadida Adaptiv sport turlari assotsiatsiyasi tashkil qilindi. 2024-yil noyabrida Adaptiv sport turlarini rivojlantirish dasturi tasdiqlandi.