Surxondaryo viloyati hokimi Ulug‘bek Qosimov 14-yanvar – Vatan himoyachilari kuni munosabati bilan viloyat hokimi o‘rinbosarlari hamda shahar va tuman hokimlarini mukofotlash uchun 661 million so‘m ajratdi. Bu bo‘yicha 20-yanvar kuni viloyat hokimining farmoyishi qabul qilingan.
Farmoyishda viloyat hokimining birinchi o‘rinbosarining 2025-yil 14-yanvardagi bildirishnomasi hamda viloyat Iqtisodiyot va moliya bosh boshqarmasining 2025-yil 14-yanvardagi xati inobatga olinib, viloyat byudjetining joriy yil boshida shakllangan erkin qoldiq mablag‘lari hisobidan 14-yanvar – Vatan himoyachilari kuni munosabati bilan o‘z faoliyatlarida erishayotgan muvaffaqiyatlari, o‘zlariga yuklatilgan vazifalarni vijdonan, sifatli va o‘z vaqtida bajarayotganliklari uchun mukofotlash belgilangan. Buning uchun jami 661 million 250 ming so‘m ajratilgan.
Jumladan, viloyat hokimining 7 nafar o‘rinbosarlarini rag‘batlantirish uchun 201 million 250 ming, viloyat hokimining oila va xotin-qizlar masalalari bo‘yicha o‘rinbosari – viloyat Oila va xotin-qizlar boshqarmasi boshlig‘ini rag‘batlantirish uchun 28 million 750 ming ming, shuningdek, Termiz shahar va tumanlar hokimlarini rag‘batlantirish uchun esa 431 million 250 ming so‘m ajratilgan.
Viloyat hokimligi farmoyishiga asossiz ravishda XDFU (xizmat doirasida foydalanish uchun) belgisini qo‘ygan. Shuningdek, “shaxsga oid” degan vaj bilan berkitib qo‘yilgan.
“Davlat hokimiyati va boshqaruvi organlari faoliyatining ochiqligi to‘g‘risida” qonunining 5-moddasiga ko‘ra, byudjetdan ajratiladigan mablag‘lar, byudjet tashkilotlarining byudjetdan tashqari jamg‘armalari mablag‘laridan foydalanilishi to‘g‘risida tegishli axborot davlat hokimiyati va boshqaruvi organlarining faoliyati to‘g‘risidagi axborot jumlasiga kirishi belgilangan. Bundan ko‘rinib turibdiki, qonunchilikka muvofiq ushbu farmoyish byudjet taqsimotiga doir bo‘lgani bois ochiq ko‘rinib turishi shart edi.
Qiziq jihati, rag‘batlantishga shuncha mablag‘ ajratgan hokimlikning 12 ta ijro hujjatlari bo‘yicha jami 48 million 795 ming so‘m qarzdorligi mavjudligi va ayrimlari bir necha yillardan buyon to‘lanmay kelayotganini ko‘rish mumkin.
Ushbu rag‘batlantirish viloyat iqtisodiyoti gullab-yashnayotganini anglatmaydi. Aksincha, 2024-yilda viloyatda mahalliy byudjet daromadlari 3,1 trln so‘mni, xarajatlari esa 4,9 trln so‘mni, defitsit 1,8 trln so‘mni tashkil etgan. 2025-yilda esa respublika byudjetidan viloyat byudjetiga ajratiladigan tartibga soluvchi byudjetlararo transfertlar miqdori 2 trln 62 mlrd so‘mni tashkil etishi kutilmoqda.
Izoh (2)
Хоким боба биз Термиз шахрида яшаймиз ипотека киридит ка 5йил олдин уй олганмиз ногирон боларим билан яшаб келяпман бокувчим ёк касалчилик туфайли банкдан олган уйимиз ни киридитини тулолмай колганмиз банк уйимни судга оширди суд мипга оширди уйимни ауксиёнга куямиз деб бир ой мухлат берган бокувчим йок икки норасида гудакларим билан кайирга бораман илтимос менга ёрдам килинг Термиз шахар мангузар махахалласидан
Undan kura yetim yesir, nochor oilalarga taqsimlangani adolatli bo'lar edi. Hokimlik organlarining oylik maoshi yetarlicha deb o'ylayman. Kimgadir bu pullar arzimasdek go'yo lekin shunday insonlar borki ularga xozir 1 so'm xam juda qadirli. Xulosa o'zingizdan...