Samarqandni bayramona yoritish uchun 250 mln so‘m, Jizzaxni bezatishga 100 mln. O‘zbekiston shahar va tumanlarining Yangi yilga tayyorgarligi qanchaga tushmoqda?

Dunyoning aksariyat mamlakatlari qatori O‘zbekiston ham dekabrning ikkinchi yarmida bayramona ko‘rinishga kiradi. Shaharlar va boshqa aholi punktlarida Yangi yil bayramining bosh atributi — bayram archalari paydo bo‘ladi, maydonlar tantanavor bezatiladi. “E-qaror” tizimi ishga tushib, mahalliy hokimiyat organlarining (qariyb barcha) qarorlarini onlaynda ko‘rish imkoniyati paydo bo‘lgach, hududlarda eski yilni kuzatib, yangi yilni kutib olish uchun qancha mablag‘ va kuch-vositalar sarf qilinayotganini ko‘rish mumkin bo‘ldi. “Daryo” shu yo‘nalishdagi qarorlarni o‘rganib chiqdi.

Jizzax shahrini bayramona bezatish uchun 100 million, to‘rt tumanga esa jami 223 million

Jizzax viloyati hokimining 11-dekabrdagi farmoyishiga asosan, viloyat moliya bosh boshqarmasiga viloyat budjetining daromadlar rejasining oshirib bajarilgan qismi mablag‘lari hisobidan Jizzax shahar hokimligi ma’muriy binosida amalga oshirilayotgan qurilish-ta’mirlash ishlari uchun 1 milliard so‘m, 2022-yil kirib kelishi munosabati bilan shahar hududida archalar o‘rnatish va bezash ishlarini amalga oshirish uchun 100 million so‘m — jami 1,1 milliard so‘m mablag‘ni Jizzax shahar mahalliy budjetiga o‘tkazib berish vazifasi topshirilgan.

Ayni vaqtda, Jizzax shahar hokimining 16-dekabrdagi farmoyishiga ko‘ra, shahar moliya bo‘limiga shahardagi Mustaqillik maydoniga o‘rnatiladigan markaziy Yangi yil archasi va Sharof Rashidov shoh ko‘chasini xamda shaharning gavjum joylarini bayromona bezash maksadida shahar mahalliy byudjetining daromadlar rejasining oshirib bajarilgan qismi xisobidan 91,7 million so‘m mablag‘ni shahar obodonlashtirish boshqarmasiga ajratish vazifasi yuklatilgan.

Jizzax viloyatining Mirzacho‘l tumani hokimining 15-dekabrdagi farmoyishiga binoan, tuman moliya bo‘limiga Yangi yil bayramini o‘tkazishga tayyorgarlik ko‘rish va sovg‘alar olish maqsadida tuman mahalliy budjetining 2021-yil uchinchi chorak daromadlar rejasining oshirib bajarilgan qismi hisobidan tuman hokimligiga 15 million so‘m va tuman Obodonlashtirish boshqarmasiga 15 million so‘m — jami 30 million so‘m mablag‘ ajratish vazifasi yuklatilgan.

Xalq deputatlari Arnasoy tumani kengashining qaroriga ko‘ra, tuman hokimligi moliya bo‘limiga tumanda Prezident archasini bezash va Yangi yil bayram tadbirini o‘tkazish bilan bog‘liq xarajatlar uchun tuman mahalliy byudjetining 2021-yil uchinchi chorak daromadlar rejasining oshirib bajarilgan qismi hisobidan 30 million so‘m va viloyat byudjetidan olingan ssuda hisobidan 50 million so‘m — jami 80 million so‘m mablag‘ tuman Obodonlashtirish boshqarmasiga ajratilgan.

Xalq deputatlari G‘allaorol tumani kengashi qaroriga muvofiq, tuman Madaniyat bo‘limiga Yangi yil bayrami dasturi va tadbirlarini ishlab chiqish hamda ko‘tarinki ruhda o‘tkazish uchun tuman mahalliy byudjetining 2021-yil birinchi va uchinchi chorak daromadlar rejasining oshirib bajarilgan qismi hisobidan 50 million so‘m mablag‘ ajratilgan.

Zafarobod tuman kengashi Yangi yil bayramini ko‘tarinki ruhda o‘tkazish hamda bayram dasturxoni tashkil etish uchun 60 million so‘mni tuman hokimligiga, qorbobo va qorqiz kiyimlarini xarid qilish uchun 3 million so‘mni esa tuman hokimligining Madaniyat bo‘limiga ajratish haqida qaror chiqargan. Mazkur mablag‘lar tuman mahalliy byudjeti daromadlar rejasining 2021-yil uchinchi chorakda orttirib bajarilgan qismi hisobidan ajratilishi ko‘rsatib o‘tilgan.

Andijonda ham archa o‘rnatiladi, lekin qanchaga tushadi — ma’lum emas

Andijon viloyati hokimining 16-dekabrdagi farmoyishida viloyatda o‘rnatiladigan archa uchun ajratiladigan mablag‘lar borasida ma’lumot ko‘rsatilmagan. Farmoyishda jamoat tartibini saqlash va aholi xavfsizligini ta’minlash bilan bog‘liq ishlarni tashkil etish borasida mas’ullarga topshiriqlar berilgan.

Shuningdek, viloyat teleradiokompaniyasi, “Andijonnoma” va “Andijanskaya pravda” gazetalari tahririyatiga yangi 2022-yil va Prezident archasi tadbirlariga tayyorgarlik ko‘rish va o‘tkazish davrida jamoat tartibi hamda yong‘in xavfsizligini ta’minlash masalalari bo‘yicha aholi hushyorligini oshirishga qaratilgan ko‘rsatuvlar va maqolalar chop etilishini tashkil etish tavsiya etilgan.

Viloyatning Baliqchi tumani hokimining farmoyishida tumandagi “Markaz” mahallasi hududiga Yangi yil archasi o‘rnatilishiga ruxsat berilishi ma’lum qilingan.

Namanganda ham Andijondagi kabi holat

Namangan shahar hokimining 11-dekabrdagi qaroriga asosan, Yangi yil bayramiga tayyorgarlik ko‘rish va uni o‘tkazish bo‘yicha ishchi guruhga Obodonlashtirish boshqarmasi bilan hamkorlikda “Zahiriddin Muhammad Bobur” bog‘i, “Afsonalari vodiysi”, viloyat madaniyat markazi oldidagi maydonga 15-dekabr kuniga qadar bayram archasini o‘rnatish va bu joylarni bayramona bezash ishlarini amalga oshirish topshirilgan.

Shuningdek, pandemiya sharoitidan kelib chikib kelishilgan holda 2021-yil 17-dekabrdan 2022-yil 9-yanvarga qadar har kuni soat 10:00 dan 12:00 gacha hamda 15:00 dan 23:00 gacha “Bobur”, “Afsonalari vodiysi”, viloyat madaniyat markazi oldidagi maydonga o‘rnatilgan archalar atrofida “Yangi yil” shou-dasturlarini o‘tkazish, ularda taniqli san’atkorlarning chiqishlarini ta’minlash belgilangan.

Bundan tashqari, shahar hokimligining axborot xizmati hamda “Namangan sadosi” gazetasi bosh muxarririga Yangi yil bayramini OAVda keng yoritilishini tashkil etish tavsiya qilingan.

Farg‘onaning ikki tumanida bayramni tashkillashtirish uchun 86,7 million so‘m ajratildi

Buvayda tumani hokimining farmoyishi bilan hokimlikning 10-dekabrdagi tumanda Prezident archasi tadbirlarini o‘tkazish bo‘yicha yig‘ilishi bayoni ijrosini ta’minlash maqsadida mahalliy budjetning 2021-yil birinchi chorak daromadlar rejasining ortiqcha bajarilgan qismi hisobidan 80 million so‘m ajratilgan.

Bag‘dod tumani hokimining 16-dekabrdagi farmoyishiga binoan, tuman hokimi o‘rinbosarining 14-dekabr kungi bildirishini ijrosini ta’minlash maqsadida tuman markaziga o‘rnatilgan Yangi yil archasi atrofiga bannerlar tayyorlash bilan bog‘liq xarajatlar uchun tuman mahalliy budjetining 2021-yil daromadlar rejasini orttirib bajarilgan qismi hisobidan 6,7 million so‘m tuman Madaniyat bo‘limiga ajratilgan.

Mahalliy davlat hokimiyati organlari tomonidan qabul qilinadigan qarorlarni ishlab chiqish, kelishish va ro‘yxatdan o‘tkazishning yagona elektron tizimida viloyat markazi — Farg‘ona shahrida o‘rnatiladigan archa haqida ma’lumot yo‘q.

Samarqand shahri ko‘chalarini bezash uchun 250 million so‘m

Samarqand shahar hokimining 29-noyabrdagi farmoyishiga asosan, shahar hokimligiga boshqarma va tashkilotlardan, fuqarolardan kelib tushayotgan murojaatlarni inobatga olib, shuningdek, shaharda bir qator ijtimoiy va iqtisodiy tadbirlarni amalga oshirish maqsadida shahar mahalliy budjetining zaxira jamg‘armasi mablag‘lari hisobidan, xususan, bayram bilan bog‘liq tadbirlar uchun 298,6 million so‘m ajratilgan.Farmoyish ilovasida Yangi yil bayramini munosib kutib olish uchun shahar markaziy ko‘chalarini bayramona illyuminatsiya bezaklari bilan bezatish bilan bog‘liq xarajatlar uchun 250 million so‘m ajratilgani ko‘rsatib o‘tilgan.

Qashqadaryo viloyatining uch tumanida archa o‘rnatish uchun jami 110 million so‘mdan ko‘proq mablag‘ ajratilgan

Xalq deputatlari Kitob tumani kengashining qarori bilan tuman obodonlashtirish boshqarmasiga uning balansidagi UAZ Patriot xizmat avtomashinasi ta’mirlash va shina sotib olish hamda Yangi yil bayrami munosabati bilan Prezident archasini bezash xarajatlariga 39 million so‘m mablag‘ ajratilgan. Qarorda ta’kidlanishicha, bu pul tuman mahalliy budjetining 2021-yil boshidagi erkin qoldiq mablag‘lari hisobidan ajratiladi.

Chiroqchi tumani hokimining 13-dekabrdagi qarorida tuman moliya bo‘limiga Qashqadaryo viloyat mahalliy budjetining 2021-yil 3-chorak daromadlar rejasining oshirib bajarilgan qismi hisobidan tuman markazida o‘rnatilayotgan Yangi yil archasini bezash bilan bog‘liq xarjatlar uchun tuman Obodonlashtirish boshqarmasi hisob-raqamiga 72,4 million so‘m mablag‘ ajratilishini ta’minlash haqida topshiriq berilgan.

Kasbi tumani hokiming qarori bilan, Yangi yil archasi o‘rnatish xarajatlari uchun tuman Obodonlashtirish boshqarmasiga 40 million so‘m mablag‘ ajratilgan.

Xorazm viloyati va Hazorasp tumanida 31-dekabrga qadar “Xavfsiz hudud” maxsus profilaktik tadbiri o‘tkaziladi

Xorazm viloyati hokimining 4-dekabrdagi “Viloyat hududida ‘Xavfsiz hudud’ profilaktik tadbirini o‘tkazish to‘g‘risida”gi qaroriga asosan, 31-dekabrga qadar viloyatda “Xavfsiz hudud” maxsus profilaktik tadbiri o‘tkazilishi aytilgan. Shuningdek, viloyatning mas’ul shaxslariga vazifa va topshiriqlar berilgan.

Hazorasp tumani hokimining 17-dekabrdagi qarorida viloyat hokimining rahbarlik va ijro uchun qabul qilingan. Mazkur qarorda ham Yangi yil kechasiga qadar tumanda “Xavfsiz hudud” maxsus profilaktik tadbiri o‘tkazilishi aytilgan.

Ohangaronda “bayramni ko‘tarinki ruhda o‘tkazish maqsadida” 160 million so‘m ajratilgan

Ohangaron tumani hokimining 10-dekabrdagi farmoyishiga asosan, tumanda yangi yil bayramini ko‘tarinki ruhda o‘tkazish maqsadida, Yangi yil archasi va sahna bezaklari o‘rnatish xarajatlari uchun 160 million so‘m mablag‘ tuman hokimligiga ajratilgan. Mazkur mablag‘ning 43 milllioni ikkinchi chorak yakuni bilan shakllangan daromadlar rejasini orttirib bajarilgan qismidan, 117 millioni esa ilovaga asosan mahalliy byudjetga tiklangan mablag‘lar hisobidan ajratilgani aytilgan.

Chirchiq shahri hokimining 13-dekabrdagi qaroriga ko‘ra, shaharda 10-dekabrdan 2022-yilning 5-yanvar sanasiga qadar shahar “Kimyogarlar” madaniyat saroyi xovlisida bayram archasi o‘rnatiladi hamda bayram tadbirlari bo‘lib o‘tadi. Qarorda aytilishicha, shu muddatda Madaniyat ko‘chasining “Kimyogarlar” madaniyat saroyi joylashgan hududida sutka davomida avtomobillar harakati to‘xtatiladi.

Qarorda bayram archasini o‘rnatish bilan bog‘liq xarajatlar to‘g‘risida ma’lumotlar keltirilmagan,

Angor tumanida dekabrda “Xavfsiz hudud” maxsus tezkor profilaktik tadbiri o‘tkaziladi

Surxondaryo viloyati, Angor tumani hokimining 16-dekabr kungi farmoyishiga ko‘ra, “Prezident archasi” va “Yangi yil” bayramiga tayyorgarlik ko‘rish va uni o‘tkazish davrida jamoat tartibini saqlash, fuqarolar xavfsizligini ta’minlash, huquqbuzarliklar hamda jinoyatchilikning oldini olish, favqulodda holatlarga yo‘l qo‘ymaslik yuzasidan “Xavfsiz hudud” tadbirini o‘tkazish maqsadida 1-dekabrdan 31-dekabrga qadar tumanda “Xavfsiz hudud” maxsus tezkor profilaktik tadbiri o‘tkaziladi.

Shuningdek, qarorda tuman hokimining barcha o‘rinbosarlari va boshqa mas’ullarga topshiriqlar berilgan.