Turkiyaning Albayrak Holding kompaniyasi Toshkentdagi “Beshyog‘och” dehqon bozori o‘rnida biznes-markaz qurishi haqida xabarlar tarqalgandi. Chilonzor tumani hokimligi matbuot xizmati ushbu kompaniya bilan o‘tkazilgan onlayn muzokara yuzasidan qo‘shimcha ma’lumot berdi.
13-yanvar kuni tuman hokimi o‘rinbosari Abduhamid Abduqodirov, Investitsiyalar, sanoat va savdo vazirligi ma’sullari bilan Turkiyaning Albil Merkez Hizmetler ve Ticaret Anonim Sirketi — Albayrak Holding kompaniyasi vakillari o‘rtasida “Beshyog‘och” dehqon bozori o‘rnida yirik biznes markazi tashkil etish bo‘yicha onlayn muzokoralar olib borilgan.
Loyiha taqdimotidan e’lon qilingan slaydga ko‘ra, majmuaga 4 ta ko‘p qavatli bino kiradi: ikkita turar joy binosi (Crown Residence), bitta tijorat osmono‘par binosi (Skyscraper) va aralash bino (Wave Residence & Office).
Hokimlik xabarida qayd etilishicha, “Beshyog‘och” dehqon bozori o‘rnida yirik biznes markazi tashkil etish faqat muhokama bosqichida bo‘lib, bu borada turk kompaniyasining taklifi tinglandi.
“Ayni vaqtda loyiha aniq amalga oshishi, uning muddatlari va qiymati haqida hech qanday rejalar yo‘q. Bunga o‘xshash takliflar yana bo‘lsa, tumanga investisiya kiritish maqsadida hokimlik investorlar bilan uchrashishga tayyor”, deyiladi xabarda.
Hokimlik ma’lumot tarqatishda e’tiborli bo‘lishni va aholi orasida noto‘g‘ri fikr uyg‘otmaslikni so‘radi.
Qurilish va uy-joy kommunal xo‘jaligi vazirligi ham Toshkentdagi “Beshyog‘och” dehqon bozori o‘rnida biznes-markaz qurish haqidagi xabarlarga munosabat bildirib, bu maʼlumot mutlaqo haqiqatga to‘g‘ri kelmasligini maʼlum qildi.
“Gap shundaki, endilikda Toshkent shahrida amalga oshiriladigan barcha qurilishlarga tasdiqlangan bosh rejaga muvofiq ruxsat beriladi. Poytaxt bosh rejasiga ko‘ra ushbu renovatsiya hududida 9 qavatgacha bino qurilishi belgilangan. Hozirda mazkur hududda yirik biznes markazining qurilishiga oid ruxsatnoma yoki arxitektura rejalashtirish topshirig‘i mavjud emas”, deyiladi vazirlik xabarida.
Avvalroq Toshkentning Yakkasaroy tumanidagi“ Askiya” bozorini zamonaviy ko‘rinishda qurish bo‘yicha tenderda Xitoy kompaniyasi g‘olib bo‘lgani haqida xabar berilgan edi.
Yangi savdo majmuasi 3 ming kvadrat metrdan iborat ekobozor, muzlatkichli omborxona, shuningdek, eskalatorlar, panduslar, Wi-Fi nuqtalari, velosiped yo‘laklari va ko‘ngilochar obyektlarni o‘z ichiga olishi kutilmoqda. Bundan tashqari, yaqin atrofda 4 yulduzli mehmonxona qurish rejalashtirilgan.
Poytaxtning Yunusobod tumanidagi dehqon oziq-ovqat bozori to‘liq qayta qurilishi, besh barobar kengayib, bir nechta hududlardan iborat zamonaviy savdo, biznes va dam olish markaziga aylanishi ham ma’lum qilingandi.
Qurilish davrida bozor o‘z faoliyatini to‘xtatmaydi, barcha tadbirkorlar ishini davom ettiradi. Ularga ishlash uchun imkoniyat yaratib beriladi.
Izoh (0)