Toshkent shahrining Yunusobod tumanidagi dehqon oziq-ovqat bozori to‘liq qayta qurilishi, besh barobar kengayib, bir nechta hududlardan iborat zamonaviy savdo, biznes va dam olish markaziga aylanishi ma’lum qilingandi. Kecha, 17-dekabr kuni shahar hokimligi mas’ullari va loyihachilar ushbu bozorda faoliyat yurituvchi tadbirkorlar bilan uchrashib, loyiha taqdimotini o‘tkazdi. Ularni qiziqtirgan savollarga javob qaytardi. Bu haqda davra suhbatida qatnashgan “Daryo” muxbiri xabar berdi.
Loyiha jamoasi rahbari Andrey Trebunskixning ma’lumot berishicha, bozor hududida xaridorlar va tadbirkorlar uchun katta muammo bo‘lib turgan avtoturargoh masalasiga alohida e’tibor qaratilgan bo‘lib, hududda bir vaqtda 1000 ga yaqin mashinani sig‘diradigan yer osti va yer usti avtoturargohlari quriladi.
Mas’ullarning aytishicha, qurilish davrida bozor o‘z faoliyatini to‘xtatmaydi, barcha tadbirkorlar ishini davom ettiradi. Ularga ishlash uchun imkoniyat yaratib beriladi.
Toshkent invest kompaniyasi rahbari Bahrom Shokirov mazkur masalada ochiqlik va xalq bilan muloqot tamoyillariga sodiqligini tasdiqladi.
Loyiha turk-singapur loyihachilar jamoasi tomonidan ishlab chiqilgan bo‘lib, qishning sovuq va yozning jazirama issig‘i uchun yopiq, xarid qilishga qulay bo‘lishi aytilmoqda.
Toshkent shahar hokimligi qoshidagi Munitsipal aktivlarni boshqarish markazi DUK rahbari o‘rinbosari Kamoliddin Rasulov Yunusobod dehqon bozorida faoliyat yurituvchi tadbirkorlarning hech biri ishsiz va joysiz qolmasligini shaxsan Toshkent shahar hokimining o‘zi ma’lum qilganini, tadbirkorlarga do‘koni uchun yangi do‘kon berilishini, bozorning buzilishi davrida ham ularga ishlash uchun imkoniyat yaratilishini va’da qilgan.
Loyihachilarga Yunusobod bozorida faoliyat yurituvchi hech qaysi tadbirkor ishsiz va joysiz qolmasligi kerakligi haqida talab qo‘yilgan. Qurilish ishlari tuguganidan so‘ng, kim shu yerda ishlayotgan bo‘lsa yana ijara shartnoma qilib, faoliyat yuritishini ta’minlaymiz. Hech qaysi tadbirkor ishsiz qolmaydi, hech qayerga ketmaydi, — dedi Toshkent shahar hokimligi qoshidagi Munitsipal aktivlarni boshqarish markazi DUK rahbari o‘rinbosari Kamoliddin Rasulov.
Qo‘shimcha qilinishicha, yangi bozor uch qavatli ekobozorga aylanadi. Uning yonida hunarmandlar va zargarlar uchun savdo maydonlari va ko‘ngilochar markazga ega zamonaviy megamoll paydo bo‘ladi. Umumiy maydon 19 ming kvadrat metrdan 94 ming kvadrat metrgacha kengayadi. Loyiha asosida 4-5 mingta ish o‘rni yaratiladi.
Izoh (0)