Toshkent shahri havosi ifloslanish darajasi kecha, 27-yanvar kuni soat 23:00 holatiga o‘ta yomon holatga keldi. Ushbu jarayon 28-yanvar kuni tongda ham davom etdi.
Bugun tongda Toshkent havosi iflos shaharlar ro‘yxatida 8-o‘rinni egalladi. Poytaxt aholisi shaharda qandaydir kuygan hid borligidan shikoyat qildi.
Bunday holat kuzatilishiga bir qator sabablar, shu jumladan, poytaxt atrofini har tomondan o‘rab olgan minglab issiqxonalardan chiqayotgan zaharli tashlamalar sabab bo‘layotgani aytilmoqda.
Iqlimshunos Erkin Abdulahatov issiqxonalarning joylashuv xaritasini eʼlon qildi.
“Shamol tezligi past va kamiga shamol guli endi har tomondan shamollarni poytaxt ichiga kirib kelish yoki chiqib ketish sharoitida issiqxonalardan chiqayotgan zaharli tashlamalarning poytaxt havasida muallaq turib qolishini tasavvur qilavering”, deb yozadi u.
Xaritada Toshkent shahrining sharqiy qismida esa issiqxonalar kamligini ko‘rish mumkin.
“Yaqin yillarda oziq-ovqat xavfsizlik masalalarini barqarorlashtirishda issiqxona biznesi uchun yoz bo‘yi qishga puxta tayyorgarlikni ko‘rish choralariga eʼtibor qaratishimiz kerak bo‘ladi.
Hozir “arzimagan” gaz resurslarini issiqxonalardan “qisib”, biz kishilar salomatligi bilan bog‘liq undan-da 10 barobar ko‘p iqtisodiy zararlarni qabul qilyapmiz. Kishilarning bu ob-havo muhitida ishlash kayfiyati haqida ortiqcha nimalarnidir yozib o‘tirish shart emas menimcha”, deya qo‘shimcha qiladi iqlimshunos.
Erkin Abdulahatov, shu bilan birga, Toshkentning shimoli-sharqiy burchagi “Yangi O‘zbekiston bog‘i” hamda samolyotdan ko‘rinishi aks etgan videolarni ulashdi.
“Videoda smog xodisasini (zaharli tutun aralashmali mayda mikroskopik ifloslanish) ko‘rib turibsiz. Yuqoridagi ikki video ehtimoliy kecha tasvirga olingan. Chunki kechagi ob-havo sharoiti poytaxtda shu kabi ifloslanish tarqalishi uchun qulay muhitni taqdim etgan edi”, deya qo‘shimcha qilgan iqlimshunos.
Izoh (0)