Prezident Shavkat Mirziyoyev raisligida turizmni yanada rivojlantirish bo‘yicha ustuvor masalalar yuzasidan videoselektor yig‘ilishi va sohadagi tadbirkorlar bilan muloqot boshlandi. Bu haqda Prezident matbuot xizmati xabar berdi.
Davlat rahbari hozirgi murakkab geosiyosiy va iqtisodiy vaziyatda turizm kabi yangi ish o‘rni yaratadigan, investitsiya va eksportni ko‘paytiradigan sohalarni qo‘llab-quvvatlash zarurligini taʼkidladi.
Mamlakat turizm sohasida ana shunday ishga solinmagan salohiyat borligi, kuni-kecha Islom hamkorlik tashkiloti Turizm kengashiga raislik qilish vakolati O‘zbekistonga o‘tgani ham katta imkoniyat ekani ko‘rsatib o‘tildi.
Shu munosabat bilan mutasaddilar va hokimlar sohadagi tadbirkorlarni o‘ylantirayotgan muammolarni, fikr va takliflarini o‘rganishi, ular bilan bamaslahat ish tutishi muhimligi taʼkidlandi.
O‘tgan yil Samarqandda o‘tgan Global turizm investitsiya forumida 2,3 milliard dollarlik kelishuvlarga erishilgan edi. Lekin ayrim loyihalar bo‘yicha ishlar sust ketayotgani ko‘rsatib o‘tildi.
Masalan, Namangan, Andijon, Toshkent, Xorazm, Farg‘ona viloyatlari va poytaxtdagi loyihalarga haligacha yer tanlanmagan. Sirdaryo va Jizzaxda xorijiy hamkorlarga birorta loyiha taklif qilinmagan.
Shu bilan birga, ishlar to‘g‘ri tashkil etilgan hududlarda natija bor. Masalan, xorijiy investorlar Shahrisabz tumani G‘yelon va Sarchashma qishloqlari orasida 3 ming gektarlik tog‘-chang‘i kompleksini tashkil qilish, Miraki qishlog‘ida turizm zonasini barpo etish ishlari boshlandi.
Iqlimi, tabiati Shahrisabzga o‘xshash bo‘lgan Ohangaron, Urgut, Yangiqo‘rg‘on, Pop, Chortoq, Baxmal tumanlari hokimlarida bu borada birorta tashabbus yo‘qligi tanqid qilindi.
Izoh (0)