Namangan viloyati Pop tumani Chorkesar qishlog‘ida yashovchi Vazira Nishonova ijtimoiy tarmoqlar orqali o‘g‘lini 5 nafar yigit kaltaklagani bo‘yicha murojaat qildi. Mazkur murojaatni jurnalist Aziza Qurbonova eʼlon qildi.
Vazira Nishonovaning aytishicha, ikki kun oldin o‘g‘li Tursunqulov Maʼsudbekni chalajon holda “tomdan tushib ketgan” degan gap bilan shifoxonaga olib kelishgan. Miya chanoq singan, ikki tomonlama qon quyilish deb tashxis qo‘yishgan, bola zudlik bilan operatsiya qilingan.
Bolaning shu holatga kelishiga sababchi bo‘lgan fuqarolar — yoshlar tergovga tortilmay, erkin yurishibdi. Janjal o‘tgan yili 3-maktabni bitirgan bolalar bilan bu yil 12-maktabni bitirgan bolalar o‘rtasidan chiqqan. Besh kishi Mas’udbekni o‘lasi qilib urgan, bilyard tayoqchasi, Coca-Cola shishasi bilan boshini yorishgan, orqa tomondan sakrab, miyasining suyuqligi chiqquncha kaltaklashgan.
Vazira opa tegishli idoralarga telefon qilgan, militsiya ish ochgan. Lekin bugunga kelib, bolani urishda qatnashgan 5 kishilik guruh (B. Ya., M.X., B.N., J.H, B.A.)ning faqat bittasiga ayb yuklanib, qolganlari chiqib ketgan. Aytishlaricha, o‘sha gumonlanayotgan bola — oddiy oilaning bolasi bo‘lgani uchungina tergov izolyatorida qolgan. Qolganlar va janjalda asosiy figurant deb aytilayotgan B.ning ota-onasi esa bolasi jon olib, jon berayotgan Vazira opaga ishni bosdi-bosdi qilish uchun pul taklif qilishgan. “Qo‘lingdan nima kelsa qil” deb Mas’udbekning qarindoshlari bilan janjallashgan.
Vazira opa aslida yigitchaning ikkinchi onasi. Mas’udbekning tug‘gan onasi 2 yoshida saratondan vafot etgan. Yigitcha ayni vaqtda ikki dunyo o‘rtasida turibdi. Buning ustiga, farzandining ahvolini ko‘rib, otasi infarkt bo‘lgan, u ham o‘z hushida emas, bitta reanimatsiyada ota va bola yotishibdi, – deyiladi postda.
Holat yuzasidan Namangan viloyati IIB axborot xizmati munosabat bildirdi.
Maʼlum qilinishicha, 11-iyun kuni soat 11:30 larda Pop tumani “Madaniyat” mahallasi hududida joylashgan bilyard klubida ikki guruh yoshlar o‘zaro janjallashib, ulardan uch nafari turli xil darajadagi tan jarohatlari olishgan. Jumladan, M.T. (videodagi shaxs) hodisa natijasida og‘ir tan jarohati olgan.
Mazkur holat yuzasidan 11-iyun kuni Pop tumani IIB huzuridagi Tergov bo‘linmasi tomonidan JKning 104-moddasi (qasddan badanga og‘ir shikast yetkazish) 2-qismi “e”, “l” bandlari bilan jinoyat ishi qo‘zg‘atilib, ayblanuvchiga nisbatan qamoqqa olish tarzidagi ehtiyot chorasi qo‘llanilgan.
Shuningdek, ayblanuvchining ushbu harakatlariga daxldor bo‘lgan qolgan shaxslar ham jinoyat ishi bo‘yicha JKning 277-moddasi (bezorilik) 2-qismi “b” bandi bilan gumon qilinuvchi tariqasida ishda ishtirok etishga jalb qilingan va qonuniy qaror qabul qilinishi taʼminlanadi.
Hozirda Pop tumani IIB huzuridagi Tergov bo‘linmasi tomonidan tergov harakatlari olib borilmoqda va jinoyat ishi Namangan viloyati IIB tomonidan alohida nazoratga olingan.
Izoh (0)