Наманган вилояти Поп тумани Чоркесар қишлоғида яшовчи Вазира Нишонова ижтимоий тармоқлар орқали ўғлини 5 нафар йигит калтаклагани бўйича мурожаат қилди. Мазкур мурожаатни журналист Азиза Қурбонова эълон қилди.
Вазира Нишонованинг айтишича, икки кун олдин ўғли Турсунқулов Маъсудбекни чалажон ҳолда “томдан тушиб кетган” деган гап билан шифохонага олиб келишган. Мия чаноқ синган, икки томонлама қон қуйилиш деб ташхис қўйишган, бола зудлик билан операция қилинган.
Боланинг шу ҳолатга келишига сабабчи бўлган фуқаролар — ёшлар терговга тортилмай, эркин юришибди. Жанжал ўтган йили 3-мактабни битирган болалар билан бу йил 12-мактабни битирган болалар ўртасидан чиққан. Беш киши Масъудбекни ўласи қилиб урган, билярд таёқчаси, Coca-Cola шишаси билан бошини ёришган, орқа томондан сакраб, миясининг суюқлиги чиққунча калтаклашган.
Вазира опа тегишли идораларга телефон қилган, милиция иш очган. Лекин бугунга келиб, болани уришда қатнашган 5 кишилик гуруҳ (Б. Я., М.Х., Б.Н., Ж.Ҳ, Б.А.)нинг фақат биттасига айб юкланиб, қолганлари чиқиб кетган. Айтишларича, ўша гумонланаётган бола — оддий оиланинг боласи бўлгани учунгина тергов изоляторида қолган. Қолганлар ва жанжалда асосий фигурант деб айтилаётган Б.нинг ота-онаси эса боласи жон олиб, жон бераётган Вазира опага ишни босди-босди қилиш учун пул таклиф қилишган. “Қўлингдан нима келса қил” деб Масъудбекнинг қариндошлари билан жанжаллашган.
Вазира опа аслида йигитчанинг иккинчи онаси. Масъудбекнинг туғган онаси 2 ёшида саратондан вафот этган. Йигитча айни вақтда икки дунё ўртасида турибди. Бунинг устига, фарзандининг аҳволини кўриб, отаси инфаркт бўлган, у ҳам ўз ҳушида эмас, битта реанимацияда ота ва бола ётишибди, – дейилади постда.
Ҳолат юзасидан Наманган вилояти ИИБ ахборот хизмати муносабат билдирди.
Маълум қилинишича, 11 июнь куни соат 11:30 ларда Поп тумани “Маданият” маҳалласи ҳудудида жойлашган билярд клубида икки гуруҳ ёшлар ўзаро жанжаллашиб, улардан уч нафари турли хил даражадаги тан жароҳатлари олишган. Жумладан, М.Т. (видеодаги шахс) ҳодиса натижасида оғир тан жароҳати олган.
Мазкур ҳолат юзасидан 11 июнь куни Поп тумани ИИБ ҳузуридаги Тергов бўлинмаси томонидан ЖКнинг 104-моддаси (қасддан баданга оғир шикаст етказиш) 2-қисми “э”, “л” бандлари билан жиноят иши қўзғатилиб, айбланувчига нисбатан қамоққа олиш тарзидаги эҳтиёт чораси қўлланилган.
Шунингдек, айбланувчининг ушбу ҳаракатларига дахлдор бўлган қолган шахслар ҳам жиноят иши бўйича ЖКнинг 277-моддаси (безорилик) 2-қисми “б” банди билан гумон қилинувчи тариқасида ишда иштирок этишга жалб қилинган ва қонуний қарор қабул қилиниши таъминланади.
Ҳозирда Поп тумани ИИБ ҳузуридаги Тергов бўлинмаси томонидан тергов ҳаракатлари олиб борилмоқда ва жиноят иши Наманган вилояти ИИБ томонидан алоҳида назоратга олинган.
Изоҳ (0)