AQSHning Ogayo shtatida 16—20-iyun kunlari AQSH Metall, Minerallar va Materiallar Tashkiloti tomonidan TMS Speciality Congress 2024 jahon kongressi tashkil etildi.
Ushbu kongressda aerokosmik, mashinasozlik va ilg‘or materiallar bo‘yicha dunyoning ko‘zga ko‘ringan tashkilotlari, korxonalar va taʼlim dargohlari, jumladan, NASA, GE Aviation, Massachusetts Texnologiyalar Universiteti, Stanford Universiteti, Oak Ridge Milliy Laboratoriyasi kabi tashkilotlaridan jami 300 nafardan oshiq olimlar ishtirok etdi.
Ushbu Jahon Kongressi AQSH Metall, Minerallar va Materiallar Tashkiloti tomonidan har ikki yilda bir marta o‘tkaziladi. Bunda asosan dunyoning turli mamlakatlaridan aerokosmik, neft-gaz, og‘ir sanoatdagi yangi va ilg‘or materiallar bo‘yicha ilmiy ishlar va yangiliklar bilan ishtirok etadi. Ushbu Kongressda bu yil birinchi marta o‘zbekistonlik olimlar ham qatnashdi.
Kongressda o‘zbekistonlik olimlar yakuniy bosqichda “Yordamchi elementlarni Ni asosli superqotishmalarning mexanik xususiyatlari va mikrostrukturaviy o‘zgarishiga taʼsiri” mavzusida ilmiy ishlari bilan Elyorjon Jumayev, Orifjon Mixliyev, Dilshodbek Usmonov va Sarvar Rozixo‘jayev ishtirok etdi.
Ushbu kashfiyotning ahamiyatli tarafi shundan iboratki, hozirgi kunda dolzarb hihoblangan yangi turdagi zamonaviy materiallarni labotoriya namunalarini korxonalarda ishlab chiqarishga integratsiya qilishning yo‘llari yoritib berilgan. Ularning mexanik xususiyatlarini saqlagan holda, nano o‘lchamda strukturaviy o‘zgarishlari haqida bayon etildi.
Ushbu ishtirok o‘zbek materialshunos olimlarni dunyo miqyosida o‘z o‘rniga ega ekanligining yana bir namunasidir.
Maʼlumot uchun, ushbu tadbirda o‘z ilmiy kashfiyoti bilan ishtirok etgan Elyorjon Jumayev, texnika fanlari doktori, dunyoning ko‘zga ko‘ringan tashkilotlari, jumladan, Hyundai Motors, Samsung, NASA va Oak Ridge Milliy Laboratoriyalari loyihalarida faoliyat yuritgan yosh o‘zbek olimidir. U hozirgi kunda dunyo olimlari qatorida o‘z o‘rniga ega bo‘lib, 350 dan oshiq yangi turdagi materiallarni kashf qilgan, 7 dan ortiq xalqaro patent va 10 dan ziyod dunyoning yetakchi jurnallarida ilmiy maqolalari chop etilgan.
Izoh (0)