Rossiya-Ukraina urushida pul evaziga qatnashgan o‘zbekistonlikka sud hukmi o‘qildi

Ukraina urushida qatnashgan O‘zbekiston fuqarosiga 4 yillik jazo tayinlandi. Bu haqda Oliy sud “Daryo”ga xabar berdi. 

Unga ko‘ra, 2024-yil 23-fevral kuni I.Z. mavsumiy ishlash maqsadida Toshkent—Sankt Peterburg yo‘nalishidagi aviareys orqali Rossiyaning Sankt Peterburg shahriga yetib borgan. 2024-yil 12-iyun kuni u Rossiya Mudofaa vazirligi bilan bir yillik muddatga har oyda 195 000 rubl miqdorida oylik maosh olish evaziga muddatli harbiy xizmatni o‘tash to‘g‘risida shartnoma imzolagan va Rossiya-Ukraina urushida Rossiya tomonida jangovar harakatlarda ishtirok etishga rozilik bildirgan.

2024-yil 24-iyun kuni u Lugansk viloyatidagi 31985-sonli harbiy qism poligoniga borib, 14 kun davomida harbiy tayyorgarlikdan o‘tgan va ikki hafta ushbu harbiy qismda bo‘lgan. Shu davrda harbiy dron portlashi natijasida u o‘ng oyog‘idan yaralangan. 2024-yil 4-avgust kuni Belgorod shahridagi harbiy gospitalga yotqizilib, 13 kun davolangan va 17-avgust kuni yana Lugansk viloyatidagi harbiy qismga qaytgan.

Shundan so‘ng u qo‘shimcha davolanish uchun 15 kunlik ta’til so‘rab harbiy qism komandiriga murojaat qilgan, biroq rad javobini olgach, 2024-yil 5-sentyabr kuni harbiy qismlarni ruxsatsiz tark etgan. 2024-yil 1-oktyabr kuni Moskva—Samarqand yo‘nalishidagi aviareys orqali O‘zbekistonga qaytib kelgan.

2025-yil 13-fevral kuni Davlat xavfsizlik xizmati Qashqadaryo viloyati bo‘yicha boshqarmasiga o‘zining Rossiya va Ukraina o‘rtasidagi jangovar harakatlarda ishtirok etgani yuzasidan ixtiyoriy ravishda pushaymonlik arizasi bilan murojaat qilib, tegishli hujjatlarni taqdim qilgan.

Sud I.Z.ning harakatlarini Jinoyat kodeksining 154-moddasi (yollanish) 1-qismida nazarda tutilgan jinoyat deb topib, unga 4 yil muddatga ozodlikni cheklash jazosi tayinladi.

Farg‘ona viloyatida fuqarolarni Rossiya-Ukraina urushiga jo‘natishga uringan taksi haydovchisi ushlangani xabar qilingandi.