Venetsiya biyennalesida 8-may kuni O‘zbekiston Milliy pavilyonining rasmiy ochilishi va qabul marosimi bo‘lib o‘tdi. Bu haqda Saida Mirziyoyeva xabar qildi.
Bu yil Toshkentning yonginasida joylashgan “Quyosh” geomajmuasi g‘oyasini o‘zimiz bilan olib keldik. Pavilyonimiz mavzusi o‘zida muhandislik fanlari, shaharshunoslik, biologiya va sun’iy intellektni birlashtirgan va “Intelligens. Tabiiy. Sun’iy. Kollektiv” deya nomlangan biyennale mavzusiga to‘la mos keladi, deb yozdi prezident yordamchisi.
Saida Mirziyoyeva noyob “Quyosh” obyektining rolini qayta ko‘rib chiqishni taklif etdi. Uni nafaqat saqlab qolish, balki global va ilmiy munozaralarga kiritish kerakligini qayd etdi.
Bu Venetsiya biyennalesidagi beshinchi ekspozitsiyamiz. Har safar biz ona yurtimizning ko‘z ilg‘amas qadriyatlarini, tarixga ehtirom, ilm-fanga bo‘lgan muhabbatini ko‘rsatib, jahon hamjamiyatini hayratga solishda davom etamiz, deydi u.
Prezident yordamchisi ushbu loyihaga o‘z kuch-g‘ayrati, ijodi va O‘zbekistonga bo‘lgan muhabbatini baxsh etgan jamoaga minnatdorchilik bildirdi.
-28zHyLZN.avif)
O‘zbekiston Venetsiya biyennalesida so‘nggi yillarda faol ishtirok etib, o‘zining boy madaniy va me’moriy merosini xalqaro maydonda namoyish etmoqda. 2021-yilda O‘zbekiston o‘zining “Mahalla: shahar va qishloq hayoti” deb nomlangan milliy loyihasini taqdim etdi. 2022-yilda O‘zbekiston Venetsiya zamonaviy san’at biyennalesida ishtirok etdi. 2023-yilda XVIII Xalqaro Venetsiya me’morchilik biyennalesi ko‘rgazmasida O‘zbekiston milliy pavilyoni ochildi. 2024-yil aprelida anʼanalar bilan texnologiyalar o‘rtasidagi bog‘liqlik haqida hikoya qiluvchi Donʼt Miss the Cue ko‘rgazmasi taqdim etildi.
Izoh (0)