Prezident Shavkat Mirziyoyev Turkiy davlatlar tashkiloti norasmiy sammitida nutq so‘zladi. Bu haqda Prezident matbuot xizmati xabar berdi.
Davlat rahbari bugungi sammit shiddat bilan o‘zgarayotgan global vaziyat va oldindan aytib bo‘lmaydigan murakkab jarayonlar sharoitida o‘tayotganini aytdi. O‘zbekiston yetakchisi geosiyosiy va geoiqtisodiy ziddiyatlar, mintaqaviy nizolar va iqlim o‘zgarishi oqibatlarining kuchayishi barcha uchun katta sinov bo‘layotganini taʼkidladi.
“Shu sababli dolzarb muammolar yechimi bo‘yicha davlatlarimizning umumiy yondashuv va pozitsiyalarini kuchaytirish har qachongidan ham muhimdir.
Taʼkidlash lozimki, biz eng og‘riqli muammolarga xalqaro huquq meʼyorlari, Birlashgan Millatlar Tashkiloti Nizomi asosida yechim topish zarur, deb hisoblaymiz.
Ukraina atrofidagi vaziyatni diplomatiya va muzokaralar yo‘li bilan hal etishga qaratilgan amaliy saʼy-harakatlarni qo‘llab-quvvatlaymiz”, - dedi O‘zbekiston prezidenti.
Shavkat Mirziyoyev Turkiya prezidenti Rajab Toyyib Erdo‘g‘onning bu boradagi munosib hissasini alohida eʼtirof etdi.
“G‘azoda sulh bitimining buzilishi va harbiy harakatlarning qaytadan boshlanishi barchamizni chuqur tashvishga solmoqda. Toki “Ikki xalq uchun – ikki davlat” tamoyili ro‘yobga chiqmas ekan, Falastin-Isroil nizosining adolatli yechimini topish mumkin emas.
Global va mintaqaviy xavfsizlik haqida so‘z yuritar ekanmiz, Afg‘onistondagi murakkab vaziyatni inobatga olishimiz va unga birgalikda yechim topishimiz lozim. Afg‘oniston bo‘yicha qo‘shma bayonot qabul qilinayotgani tuzilmamizning bu masalaga jiddiy eʼtibor qaratib kelayotganidan dalolat beradi”, dedi O‘zbekiston yetakchisi.
Izoh (0)