Toshkentda In-Fin-Story Invest va Credit House kompaniyalari mansabdorlariga nisbatan jinoiy ishi qo‘zg‘atildi. Uy-joyni muddatli to‘lov asosida taklif qilgan ikki kompaniya ishi bo‘yicha 800 nafar fuqaro jabrlanuvchi deb topildi, yetkazilgan zarar miqdori 209 milliard so‘mdan oshgan.
Ichki ishlar vazirligi matbuot xizmati xabariga ko‘ra, Toshkent shahrida ko‘p qavatli uylarni shartnoma asosida muddatli to‘lovga sotish bilan shug‘ullangan In-Fin-Story Invest va Credit House MCHJ mansabdorlariga nisbatan jinoiy ish tergov departamenti tomonidan ish yurituvga olingan.
Mazkur jinoyat ishi doirasida 800 nafar fuqaro jabrlanuvchi deb topilgan. Umumiy zarar miqdori 209 milliard 263 million so‘m deb baholanmoqda. Ish bo‘yicha ayblanuvchi sifatida 5 kishiga nisbatan ayblov e’lon qilingan, tergov harakatlari davom etmoqda.
Hozirda ichki ishlar vaziri o‘rinbosari rahbarligida, sohaga oid mutaxassislarni jalb qilgan holda Maxsus tezkor shtab tashkil etilgan. U jabrlangan fuqarolarning murojaatlarini qabul qilmoqda.
Ma’lumot uchun, 2018-yildan beri In-Fin-Story Invest va Credit House kompaniyalari Toshkent aholisi bilan 10 yilgacha muddatli to‘lov asosida uy-joy olish bo‘yicha shartnomalar tuzgan. Dastlab shartlar jozibador bo‘lib ko‘ringan va majburiyatlar bajarilgan. Biroq keyinchalik mijozlardan tushgan mablag‘lar vositachilar orqali ishlagan qurilish kompaniyalariga to‘liq o‘tkazilmagani aniqlangan. Umumiy hisoblaganda, kompaniyalar 28 ta quruvchi tashkilot bilan shartnoma imzolagan.
Mazkur holat yuzasidan O‘zbekiston Respublikasi Jinoyat kodeksining 168-moddasi 4-qismi “a” bandi (juda katta miqdorda firibgarlik) bo‘yicha jinoiy ish qo‘zg‘atilgan.
Izoh (0)