Shavkat Mirziyoyev Turkiya xalq amaliy sanʼati va taomlari ko‘rgazmasi bilan tanishdi

Anqaraga tashrif doirasida Shavkat Mirziyoyev va rafiqasi Turkiya prezidenti Rajab Toyyib Erdo‘g‘on hamda rafiqasi hamrohligida Turkiya xalq amaliy sanʼati va taomlari ko‘rgazmasiga tashrif buyurdi. Bu haqda Prezident matbuot xizmati xabar berdi.

Oliy martabali mehmonlarga xalq ijodi jamoalarining teatrlashtirilgan chiqishlari namoyish etildi. Madaniy almashinuvlar qardosh xalqlarimizni yaqinlashtirish va do‘stligini mustahkamlashda muhim o‘rin tutishi qayd etildi.

Shu bilan Anqara shahridagi samarali O‘zbekiston-Turkiya sammiti yakunlandi. Shavkat Mirziyoyevning rasmiy tashrifi doirasida qator oliy darajadagi tadbirlar o‘tkazildi. Davlat rahbarlari tor doirada uchrashuv va Strategik hamkorlik kengashining uchinchi yig‘ilishini o‘tkazdilar.

Muzokaralar yakunida ikki davlat o‘rtasidagi keng qamrovli strategik sheriklikni chuqurlashtirish to‘g‘risida qo‘shma deklaratsiya va 19 ta ikki tomonlama hujjat imzolandi. Prezidentlar ilk bor yetakchi korxona va kompaniyalar rahbarlari bilan qo‘shma uchrashuv o‘tkazdi.

Davlat rahbarini Turkiyaning oliy davlat mukofoti – “Turkiya Respublikasi nishoni” bilan taqdirlash marosimi bo‘lib o‘tdi. Tashrif tadbirlari yakunlanganidan so‘ng, “Esonbug‘a” xalqaro aeroportida Shavkat Mirziyoyev va rafiqasini prezident Rajab Toyyib Erdo‘g‘on va rafiqasi kuzatib qo‘ydi.