Jinoyat olamida “qonundagi o‘g‘ri — Baxti Tashkentskiy” maqomini olgan Baxtiyor Qudratullayev va 36 nafar ayblanuvchi bo‘yicha sud majlisi boshlangani xabar berilgandi. Sudning birinchi majlisini kuzatgan “Daryo” muxbiriga ko‘ra, 37 nafar sudlanuvchi orasidagi yagona ayol tergovda unga bosim qilinganini, kuch ishlatilganini aytgan.
Sudlanuvchi Nargiza Jumaniyozovaning himoyachisi advokat Abdullayev himoyasi ostidagi shaxsning sudlanuvchilar orasida yagona ayol ekanini, o‘zbek xalqi ayolga har doim ehtirom ko‘rsatishini, yagona ayolning 35 nafar sudlanuvchilar orasida ichkarida o‘tirishi unga va ko‘pchilikka noqulay bo‘layotganini aytib, qamoq tarzidagi ehtiyot chorasini o‘zgartirishni so‘radi.
Mazkur iltimosnomani tasdiqlagan sudlanuvchi Jumaniyozova unga nisbatan qo‘llanilgan qamoqqa olish tarzidagi ehtiyot chorasini o‘zgartirishni so‘radi. Shuningdek, qo‘lga olinganidan beri onasi va farzandlari bilan ko‘risholmaganini aytdi. Tergov davomida unga kuch ishlatilgani, bosimga uchraganini qo‘shimcha qildi.
Sud advokat Abdullayev tomonidan kiritilgan iltimosnomani muhokama qilib, uni rad etgani haqida ajrim chiqardi.
Tergov hujjatlarida keltirilishicha, Nargiza Jumaniyozova Jinoyat kodeksining 165-moddasi 3-qismi (tovlamachilik) bilan ayblanmoqda. U Baxti Tashkentskiy yordami bilan sobiq turmush o‘rtog‘ini qo‘rqitib, har oy farzandlarining o‘qishi uchun 18 million so‘mdan pul undirib kelgan.
Sud 5-iyun, soat 10:00 ga qadar tanaffus e’lon qildi.
Eslatib o‘tamiz, 2023-yil 2-dekabr kuni Toshkent shahrida “Saidaziz medgorodok” laqabi bilan tanilgan shaxs qo‘lga olingani maʼlum bo‘ldi. U atrofiga jismonan baquvvat shaxslarni to‘plab, qarzdorlik va boshqa muammolarni qonunni chetlab o‘tgan holda hal qilib berish bilan shug‘ullangan. 3-dekabr kuni esa huquq-tartibot idoralari xodimlari “Baxti Tashkentskiy” laqabi bilan tanilgan Baxtiyor Qudratullayevni qo‘lga oldi.
Ko‘p o‘tmay Toshkent shahrida profilaktik tadbir davomida Salimboy nomi bilan tanilgan Salim Abduvaliyev ham ushlandi. 1950-yilda tug‘ilgan Abduvaliyev Salim Kirgizbayevich (248-modda 1-qismi, o‘qotar qurolni qonunga xilof ravishda saqlash) gumon qilinuvchi tarzida jalb etilgan. Mart oxirlarida unga 6 yil muddatga ozodlikdan mahrum qilish jazosi tayinlangani maʼlum bo‘ldi.
Izoh (0)