Жиноят оламида “қонундаги ўғри — Бахти Ташкентский” мақомини олган Бахтиёр Қудратуллаев ва 36 нафар айбланувчи бўйича суд мажлиси бошлангани хабар берилганди. Суднинг биринчи мажлисини кузатган “Дарё” мухбирига кўра, 37 нафар судланувчи орасидаги ягона аёл терговда унга босим қилинганини, куч ишлатилганини айтган.
Судланувчи Наргиза Жуманиёзованинг ҳимоячиси адвокат Абдуллаев ҳимояси остидаги шахснинг судланувчилар орасида ягона аёл эканини, ўзбек халқи аёлга ҳар доим эҳтиром кўрсатишини, ягона аёлнинг 35 нафар судланувчилар орасида ичкарида ўтириши унга ва кўпчиликка ноқулай бўлаётганини айтиб, қамоқ тарзидаги эҳтиёт чорасини ўзгартиришни сўради.
Мазкур илтимосномани тасдиқлаган судланувчи Жуманиёзова унга нисбатан қўлланилган қамоққа олиш тарзидаги эҳтиёт чорасини ўзгартиришни сўради. Шунингдек, қўлга олинганидан бери онаси ва фарзандлари билан кўришолмаганини айтди. Тергов давомида унга куч ишлатилгани, босимга учраганини қўшимча қилди.
Суд адвокат Абдуллаев томонидан киритилган илтимосномани муҳокама қилиб, уни рад этгани ҳақида ажрим чиқарди.
Тергов ҳужжатларида келтирилишича, Наргиза Жуманиёзова Жиноят кодексининг 165-моддаси 3-қисми (товламачилик) билан айбланмоқда. У Бахти Ташкентский ёрдами билан собиқ турмуш ўртоғини қўрқитиб, ҳар ой фарзандларининг ўқиши учун 18 миллион сўмдан пул ундириб келган.
Суд 5 июнь, соат 10:00 га қадар танаффус эълон қилди.
Эслатиб ўтамиз, 2023 йил 2 декабрь куни Тошкент шаҳрида “Саидазиз медгородок” лақаби билан танилган шахс қўлга олингани маълум бўлди. У атрофига жисмонан бақувват шахсларни тўплаб, қарздорлик ва бошқа муаммоларни қонунни четлаб ўтган ҳолда ҳал қилиб бериш билан шуғулланган. 3 декабрь куни эса ҳуқуқ-тартибот идоралари ходимлари “Бахти Ташкентский” лақаби билан танилган Бахтиёр Қудратуллаевни қўлга олди.
Кўп ўтмай Тошкент шаҳрида профилактик тадбир давомида Салимбой номи билан танилган Салим Абдувалиев ҳам ушланди. 1950 йилда туғилган Абдувалиев Салим Киргизбаевич (248-модда 1-қисми, ўқотар қуролни қонунга хилоф равишда сақлаш) гумон қилинувчи тарзида жалб этилган. Март охирларида унга 6 йил муддатга озодликдан маҳрум қилиш жазоси тайинлангани маълум бўлди.
Изоҳ (0)