Ijtimoiy tarmoqlarda Salimboy nomi bilan tanilgan Salim Abduvaliyev va “Saidaziz medgorodok” — Saidaziz Saidaliyev hamda boshqalarning qo‘yib yuborilgani aytilgan xabarlar tarqaldi. “Daryo” so‘roviga javoban Toshkent shahar IIBB axborot xizmati ushbu xabarlar haqiqatga to‘g‘ri kelmasligini ma’lum qildi.
Ta’kidlanishicha, ijtimoiy tarmoqlarda tarqatilgan xabarlarda aytilgan shaxslar qo‘yib yuborilmagan. Hozirda tergov ishlari davom ettirilmoqda, ularga qo‘llangan qamoq ehtiyot chorasi o‘zgartirilmagan.
Dekabr oyining boshlarida Toshkent shahar IIBB poytaxtda huquq-tartibot idoralari tomonidan “ko‘cha bollari” va jinoiy guruhlarni aniqlash va qo‘lga olish bo‘yicha keng ko‘lamli reydlar o‘tkazilayotgani haqida xabar bergandi.
2-dekabr kuni Toshkent shahrida “Saidaziz medgorodok” laqabi bilan tanilgan shaxs qo‘lga olingani ma'lum bo‘ldi. U atrofiga jismonan baquvvat shaxslarni to‘plab, qarzdorlik va boshqa muammolarni qonunni chetlab o‘tgan holda hal qilib berish bilan shug‘ullangan. 3-dekabr kuni esa huquq-tartibot idoralari xodimlari “Baxti Tashkentskiy” laqabi bilan tanilgan Baxtiyor Qudratullayevni qo‘lga oldi.
Ko‘p o‘tmay Toshkent shahrida profilaktik tadbir davomida Salimboy nomi bilan tanilgan Salim Abduvaliyev ham ushlandi. 1950-yilda tug‘ilgan Abduvaliyev Salim Kirgizbayevich (248-modda 1-qismi, o‘qotar qurolni qonunga xilof ravishda saqlash) gumon qilinuvchi tarzida jalb etilgan.
Izoh (0)