“Daryo”da “Saidaziz medgorodok” va uning yigitlari tadbirkorga bosim o‘tkazib, zo‘ravonlik bilan unga tegishli pechenye zavodini tortib olishga uringani hikoya qilingandi. Mazkur videomaterial keng muhokamalarga sabab bo‘lgach, 6-qavat ishtirokchilari holatga izoh berib, voqea tadbirkor aytganidek bo‘lmaganini bildirdi.
Voqea haqida “Daryo”ga gapirib bergan Aziz Risqiyevga ko‘ra, 6-qavatda sodir bo‘lgan voqeadan so‘ng, tadbirkor Murod To‘xtayev unga holat haqida aytib bergan. Ammo unga nisbatan bosim bo‘lganini, qo‘rqitilganini aytmagan. Buni isbotlash uchun unda Murod To‘xtayev bilan bo‘lib o‘tgan suhbat audiosi ham bor, “Lekin ayni paytda sud jarayonlari ketayotgani sababli buni ochiqlay olmayman”, — deydi u.
Oltinchi qavatda sodir bo‘lgan voqeani Murod akaning o‘zidan eshitdim. O‘sha kuni voqea joyida men bo‘lmaganman. Murod aka videomaterialda Aziz ham bor edi o‘sha kuni, deya yolg‘on ma’lumot bergan. Bu holat jamoatchilik orasida noto‘g‘ri talqin qilinmasligi uchun o‘zimiz tahririyatga kelib, raddiya beryapmiz, — deydi Aziz Rizqiyev.
Suhbatdoshning aytishicha, unda tadbirkor Murod To‘xtayevning gaplarini inkor etuvchi dalillar bor. Biroq ayni paytda sud jarayonlari ketayotgani sababli bu haqida gapira olmaydi.
Murod To‘xtayev menga zo‘ravonlik qildi, degan Sobir Isomuhammedovni yoshligimdan bilaman. Yoshligimizdan u kishi bilan boshqa tadbirkorlik sohalarida birga ishlaganmiz. Sobir aka bunday inson emas. Videoni ko‘rgan odam Sobir akani “meshennik” va zo‘ravon ekan-ku, deydi. Shu sabab men holatni ochiqlashga keldim, — deydi Aziz Rizqiyev.
Tadbirkor Murod To‘xtayev 6-qavat voqeasini esga olganda “Asad aka ham voqea joyida bor edi, lekin ular ayni kunda ochiqda yuribdi, ularga chora ko‘rilmadi”, degan. “Daryo” tahririyatiga kelib, voqeaga izoh bergan Asad Tojiyevning bildirishicha, u Sobir Isomuhammedov va Murod To‘xtayev o‘rtasidagi suhbatda bo‘lmagan.
Murod To‘xtayev oltinchi qavatdagi voqeada Asad bor edi, degani uchun men bugun keldim. Izoh bermoqchiman. O‘sha kuni xonada haqiqatdan ham bor edim. Ammo Murod Asad aka, besh daqiqa chiqib turing, Sobir aka bilan gaplashib olaylik, degani uchun men xonadan chiqib turganman. Qolaversa, uning qo‘lini ushlamaganman va unga bosim ham qilmaganman. Oyna deb gapirgan. Oynaning oldiga, shkaf tomonga ham umuman o‘tilmagan. Bu tergov jarayonida ham aytilgandi. Biroq tasdig‘ini topmadi, — deydi Asad Tojiyev.
Suhbatdoshning aytishicha, o‘zini tadbirkor deb atayotgan Murod To‘xtayev hech qanday tadbirkor emas, u pechenye zavodida ish yurituvchi bo‘lib ishlagan.
Murod To‘xtayev tomonidan ayblangan va oltinchi qavat voqeasida uning qo‘lini qayirib, qo‘rqitishda ishtirok etgani aytilgan Zoir Mirdadayev ham tadbirkor gaplarini inkor etmoqda.
Yolg‘on gapirilgan. U yerda 8-10 nafar guvoh bo‘lgan. Agar oltinchi qavat voqeasi sodir bo‘lganida, biz ochiqda yurmas edik. U yerda faqat ularning o‘zining hisob-kitobi, ichki ishlarini gaplashib olish voqeasi bo‘lgan. Shuningdek, u yerda Aziz bo‘lmagan. Ko‘p odam bo‘lgan, — deydi Zoir Mirdadayev.
Suhbatdosh ayni paytda sud tergovi ketayotgani bois ko‘p ma’lumotlarni ochiqlay olmasligini, biroq tadbirkorning gaplarini inkor etuvchi dalillarga ega ekanini aytmoqda.
Tuhmat bilan qamab yuborish imkoni bo‘lganda, men hozir yoningizda o‘tirmas edim. U yerda ko‘p guvohlar bor edi. Ular bunday zo‘ravonlik bo‘lmaganini tasdiqlaydi. Yolg‘on gaplar aytildi. Hozir sud tergovi ketayotgani bois ko‘p gaplarni aytolmayapman. Lekin bitta gapni aniq aytishim mumkinki, Murod aka 2019-yildan beri zavodga kirolmayapman, degan. 2020-yilda men shu zavodga ishga kelganman. Meni aynan Murod akaning o‘zi ishga olgan. 2019-yilmas, 2020-yilda ham Murod aka zavodda ishlagan. 2022-yilning oktyabr oyiga qadar o‘zlari zavodda bosh-qosh bo‘lgan, — deydi Zoir Mirdadayev.
Suhbatdoshning aytishicha, Murod To‘xtayev boylik orttirish uchun Sobir Isomuhammedov va ularga tuhmat qilmoqda.
Yana bir suhbatdosh Abdishukur Abduqodirovning ma’lumot berishicha, Murod To‘xtayev Sobir Isomuhammedovning yoniga ish so‘rab kelgan va oddiy ishchi sifatida ish boshlagan. Shuningdek, uning zavodda 50 foiz ulushim bor, degan gaplari ham yolg‘on.
Eslatib o‘tamiz, tadbirkor Murod To‘xtayev “Daryo”ga oltinchi qavat voqeasi haqida gapirib berar ekan Jinoyat ishlari bo‘yicha Yunusobod tuman sudida 2024-yilning 14-iyun kuni Saidaziz Saidaliyev va ikki nafar kishining unga nisbatan qilgan xatti-harakatlari uchun yana bir sud ishi boshlanganini aytdi. Sud ishi doirasida Saidaziz Saidaliyev Jinoyat kodeksining 165-modda 3-qismi “a” bandi, “v” bandi (tovlamachilik), Sobirjon Isomuhammedov 165-modda 3-qismi “a” bandi, “v” bandi (tovlamachilik), 168-modda 3-qismi “a” bandi, “b” bandi (firibgarlik), 168-modda 3-qismi “a” bandi (firibgarlik) hamda Mirsolix Mirxo‘jayev 165-modda 3-qismi “a” bandi, “v” bandi (tovlamachilik) bilan ayblanmoqda. Shuningdek, murojaatchi bugungi kunlarda davom etayotgan sudda Saidaziz va yonidagi yigitlari sud qilinayotganini, lekin buyurtmachi ochiqda yurganini aytib, “Tag‘inam garov ehtiyot chorasi qo‘llangan bo‘lsa-da, mas’ul tashkilotlar xabardor qilinmagan holda haj safariga jo‘nab ketibdi. Zoir degan bola guvoh bo‘lib o‘tibdi. Asad degan bola umuman ko‘rinmayapti. Ular ham o‘sha kuni voqeaning asosiy ishtirokchisi bo‘lgan-ku. Sobir Isomuhammedov haj safarida yurganini isbotlash uchun menga rasm tashlab yuboribdi. Qo‘lingdan nima keladi deb”, — degandi.
“Kun.uz” nashrining yozishicha, “Saidaziz medgorodok”ka oid yana bir ishda uning sherigi bo‘lgan Sobirjon Isomuhammedov qidiruvga berilgan.
Izoh (0)