5-iyun kuni Abu-Dabida bo‘lib o‘tadigan O‘zbekiston va BAA o‘rtasidagi muhim bellashuv arafasida futbol maydonidan tashqarida kutilmagan voqealar yuz bermoqda. Mundial yo‘llanmasi yoqasida turgan Temur Kapadze jamoasini nafaqat raqib, balki tashqi bosimlar ham kutayotganga o‘xshaydi.
O‘yinni yoritish maqsadida BAAga yo‘l olgan ko‘plab o‘zbekistonlik jurnalistlar Abu-Dabi va Sharja aeroportlarida hech qanday izohsiz soatlab, ayrimlari esa bir sutkagacha ushlab turilgan. Bu holatlar hanuz davom etmoqda. Ayrim jurnalistlarga deportatsiya ehtimoli haqida ogohlantirish berilgani aytilmoqda. Biroq BAA rasmiylari bu holatga rasmiy izoh bermagan.
“Daryo” nashrining Abu-Dabidagi manbasiga ko‘ra, vaziyatga O‘zbekistonning BAAdagi konsulliklari aralashmoqda. Ayrim jurnalistlarning deportatsiya qarori bekor qilingan va ularga mamlakatga kirishda amaliy yordam ko‘rsatilgan. Diplomatik vakillar hozirda aeroportlarda qolayotgan fuqarolar bilan ishlashni davom ettirmoqda. Biroq asosiy savol ochiq qolmoqda: nima sababdan bunday to‘siqlar yuz bermoqda?
Tan olish kerak: bu oddiy tartib-intizom emas — bu bosim. Shuhrat Shokirjonovning X (sobiq Twitter) sahifasida yozilishicha, Abu-Dabida faoliyat yuritayotgan o‘zbekistonlik tadbirkor mahalliy politsiya tomonidan mahkamaga chaqirtirilgan. Unga, agar ishchilari futbol o‘yiniga borib, guruh bo‘lib muxlislik qilsa, deportatsiya choralari qo‘llanishi mumkinligi haqida ogohlantirish berilgan. Ogohlantirish yozma tarzda rasmiylashtirilib, tilxat imzolattirilgan. 
Shu o‘rinda haqli savol tug‘iladi: nega futbol o‘yini arafasida aynan o‘zbekistonlik muxlislarga bunday cheklovlar qo‘llanmoqda? Ayrim manbalar buni “profilaktik chora” deya izohlashga harakat qilmoqda, ammo bu holat aynan psixologik bosim sifatida qabul qilinmoqda.
Jurnalist Azamat Umarovning yozishicha, BAA — O‘zbekiston o‘yinida o‘zbekistonlik muxlislarga turli cheklovlar qo‘yilishi mumkin. Jumladan, stadionga bayroq, ovozli moslamalar (doira, surnay va boshqalar) olib kirish taqiqlanishi mumkin. Bunday holatlar sport tamoyillariga zid bo‘lishi shubhasiz.
Sharhlovchi Hasan Turdialiyev esa o‘zining Telegram kanalida aeroportda ushlab turilganini ma’lum qilgan. Unga ko‘ra, bir nechta O‘zbekiston fuqarosining pasportlari vaqtincha olib qo‘yilgan, ammo bunga izoh berilmagan. Hatto konsullik ham ushbu vaziyatda tezkor yechim topa olmagan.
Futbol — raqobat maydoni. Ammo bu raqobat faqat maydonda bo‘lishi kerak. Tashqi bosim orqali g‘alaba qozonish — sport etikasi uchun qabul qilinmas yondashuvdir.
Izoh (0)