“Дарё”да “Саидазиз медгородок” ва унинг йигитлари тадбиркорга босим ўтказиб, зўравонлик билан унга тегишли печенье заводини тортиб олишга урингани ҳикоя қилинганди. Мазкур видеоматериал кенг муҳокамаларга сабаб бўлгач, 6-қават иштирокчилари ҳолатга изоҳ бериб, воқеа тадбиркор айтганидек бўлмаганини билдирди.
Воқеа ҳақида “Дарё”га гапириб берган Азиз Рисқиевга кўра, 6-қаватда содир бўлган воқеадан сўнг, тадбиркор Мурод Тўхтаев унга ҳолат ҳақида айтиб берган. Аммо унга нисбатан босим бўлганини, қўрқитилганини айтмаган. Буни исботлаш учун унда Мурод Тўхтаев билан бўлиб ўтган суҳбат аудиоси ҳам бор, “Лекин айни пайтда суд жараёнлари кетаётгани сабабли буни очиқлай олмайман”, — дейди у.
Олтинчи қаватда содир бўлган воқеани Мурод аканинг ўзидан эшитдим. Ўша куни воқеа жойида мен бўлмаганман. Мурод ака видеоматериалда Азиз ҳам бор эди ўша куни, дея ёлғон маълумот берган. Бу ҳолат жамоатчилик орасида нотўғри талқин қилинмаслиги учун ўзимиз таҳририятга келиб, раддия беряпмиз, — дейди Азиз Ризқиев.
Суҳбатдошнинг айтишича, унда тадбиркор Мурод Тўхтаевнинг гапларини инкор этувчи далиллар бор. Бироқ айни пайтда суд жараёнлари кетаётгани сабабли бу ҳақида гапира олмайди.
Мурод Тўхтаев менга зўравонлик қилди, деган Собир Исомуҳаммедовни ёшлигимдан биламан. Ёшлигимиздан у киши билан бошқа тадбиркорлик соҳаларида бирга ишлаганмиз. Собир ака бундай инсон эмас. Видеони кўрган одам Собир акани “мешенник” ва зўравон экан-ку, дейди. Шу сабаб мен ҳолатни очиқлашга келдим, — дейди Азиз Ризқиев.
Тадбиркор Мурод Тўхтаев 6-қават воқеасини эсга олганда “Асад ака ҳам воқеа жойида бор эди, лекин улар айни кунда очиқда юрибди, уларга чора кўрилмади”, деган. “Дарё” таҳририятига келиб, воқеага изоҳ берган Асад Тожиевнинг билдиришича, у Собир Исомуҳаммедов ва Мурод Тўхтаев ўртасидаги суҳбатда бўлмаган.
Мурод Тўхтаев олтинчи қаватдаги воқеада Асад бор эди, дегани учун мен бугун келдим. Изоҳ бермоқчиман. Ўша куни хонада ҳақиқатдан ҳам бор эдим. Аммо Мурод Асад ака, беш дақиқа чиқиб туринг, Собир ака билан гаплашиб олайлик, дегани учун мен хонадан чиқиб турганман. Қолаверса, унинг қўлини ушламаганман ва унга босим ҳам қилмаганман. Ойна деб гапирган. Ойнанинг олдига, шкаф томонга ҳам умуман ўтилмаган. Бу тергов жараёнида ҳам айтилганди. Бироқ тасдиғини топмади, — дейди Асад Тожиев.
Суҳбатдошнинг айтишича, ўзини тадбиркор деб атаётган Мурод Тўхтаев ҳеч қандай тадбиркор эмас, у печене заводида иш юритувчи бўлиб ишлаган.
Мурод Тўхтаев томонидан айбланган ва олтинчи қават воқеасида унинг қўлини қайириб, қўрқитишда иштирок этгани айтилган Зоир Мирдадаев ҳам тадбиркор гапларини инкор этмоқда.
Ёлғон гапирилган. У ерда 8-10 нафар гувоҳ бўлган. Агар олтинчи қават воқеаси содир бўлганида, биз очиқда юрмас эдик. У ерда фақат уларнинг ўзининг ҳисоб-китоби, ички ишларини гаплашиб олиш воқеаси бўлган. Шунингдек, у ерда Азиз бўлмаган. Кўп одам бўлган, — дейди Зоир Мирдадаев.
Суҳбатдош айни пайтда суд тергови кетаётгани боис кўп маълумотларни очиқлай олмаслигини, бироқ тадбиркорнинг гапларини инкор этувчи далилларга эга эканини айтмоқда.
Туҳмат билан қамаб юбориш имкони бўлганда, мен ҳозир ёнингизда ўтирмас эдим. У ерда кўп гувоҳлар бор эди. Улар бундай зўравонлик бўлмаганини тасдиқлайди. Ёлғон гаплар айтилди. Ҳозир суд тергови кетаётгани боис кўп гапларни айтолмаяпман. Лекин битта гапни аниқ айтишим мумкинки, Мурод ака 2019 йилдан бери заводга киролмаяпман, деган. 2020 йилда мен шу заводга ишга келганман. Мени айнан Мурод аканинг ўзи ишга олган. 2019 йилмас, 2020 йилда ҳам Мурод ака заводда ишлаган. 2022 йилнинг октябрь ойига қадар ўзлари заводда бош-қош бўлган, — дейди Зоир Мирдадаев.
Суҳбатдошнинг айтишича, Мурод Тўхтаев бойлик орттириш учун Собир Исомуҳаммедов ва уларга туҳмат қилмоқда.
Яна бир суҳбатдош Абдишукур Абдуқодировнинг маълумот беришича, Мурод Тўхтаев Собир Исомуҳаммедовнинг ёнига иш сўраб келган ва оддий ишчи сифатида иш бошлаган. Шунингдек, унинг заводда 50 фоиз улушим бор, деган гаплари ҳам ёлғон.
Эслатиб ўтамиз, тадбиркор Мурод Тўхтаев “Дарё”га олтинчи қават воқеаси ҳақида гапириб берар экан Жиноят ишлари бўйича Юнусобод туман судида 2024 йилнинг 14 июнь куни Саидазиз Саидалиев ва икки нафар кишининг унга нисбатан қилган хатти-ҳаракатлари учун яна бир суд иши бошланганини айтди. Суд иши доирасида Саидазиз Саидалиев Жиноят кодексининг 165-модда 3-қисми “а” банди, “в” банди (товламачилик), Собиржон Исомуҳаммедов 165-модда 3-қисми “а” банди, “в” банди (товламачилик), 168-модда 3-қисми “а” банди, “б” банди (фирибгарлик), 168-модда 3-қисми “а” банди (фирибгарлик) ҳамда Мирсолих Мирхўжаев 165-модда 3-қисми “а” банди, “в” банди (товламачилик) билан айбланмоқда. Шунингдек, мурожаатчи бугунги кунларда давом этаётган судда Саидазиз ва ёнидаги йигитлари суд қилинаётганини, лекин буюртмачи очиқда юрганини айтиб, “Тағинам гаров эҳтиёт чораси қўлланган бўлса-да, масъул ташкилотлар хабардор қилинмаган ҳолда ҳаж сафарига жўнаб кетибди. Зоир деган бола гувоҳ бўлиб ўтибди. Асад деган бола умуман кўринмаяпти. Улар ҳам ўша куни воқеанинг асосий иштирокчиси бўлган-ку. Собир Исомуҳаммедов ҳаж сафарида юрганини исботлаш учун менга расм ташлаб юборибди. Қўлингдан нима келади деб”, — деганди.
“Кун.уз” нашрининг ёзишича, “Саидазиз медгородок”ка оид яна бир ишда унинг шериги бўлган Собиржон Исомуҳаммедов қидирувга берилган.
Изоҳ (0)