Тошкент вилоятининг Бўстонлиқ туманидаги ер олди-сотдиси бўйича ноқонуний ҳолатлар аниқланиб, жиноят ишлари қўзғатилди.
Давлат хавфсизлик хизматининг Тошкент вилояти бўйича бошқармаси ходимлари томонидан Бош прокуратура ҳузуридаги департамент билан ҳамкорликда ўтказилган тезкор тадбирда, Бўстонлиқ туманида яшовчи, 1980 ва 1988 йилларда туғилган 2 нафар шахс ўзаро келишган ҳолда, мазкур туман ҳокимлиги томонидан боғдорчилик ва узумчиликка ихтисослашган ширкатнинг 2 нафар аъзосига далаҳовли қуриш мақсадида ажратиб берилган 20 сотих ер майдонини харидор номига расмийлаштириб бериш эвазига 230 минг доллар олган вақтида ашёвий далиллар билан ушланган.
Шунингдек, тезкор тадбир давом эттирилиб, ўзини гўёки ушбу ер участкасининг эгаси деб таништирган, 1964 йилда туғилган фуқаро ҳам ер майдонини харидор номига ўтказиб бериш эвазига ушбу 230 минг долларни олган вақтида қўлга тушган.
Бўстонлиқ туманида қайд этилган яна бир ҳолатда, 1996 йилда туғилган шахс ўзининг қариндошига туман ҳокимлигининг 2008 йилдаги қарорига асосан Чирчиқ дарёсининг муҳофаза зонасидан ободонлаштириш ҳамда қайиқлар тўхташ жойи барпо этиш учун ажратиб берилган 36 сотих ер майдонини 150 минг долларга сотишга келишиб, шунингдек, кадастр тизимида ишловчи танишлари орқали тегишли ҳужжатларни расмийлаштириб бериш эвазига 10 минг доллар талаб қилиб, жами 160 минг доллар олган вақтида ашёвий далиллар билан ушланган.
Бошқа ҳолатда эса Тошкент шаҳрида яшовчи, 1992 йилда туғилган шахс ўзганинг ишончига кириб, унга Бўстонлиқ туманида жойлашган ва 8 нафар фуқарога тегишли бўлган 72,6 сотих нотурар ер майдонининг ҳар бир сотихини 14 900 доллардан ҳисоблаб, жами 1 миллион 81 минг 740 долларга сотишга келишган.
Шунингдек, мансабдор танишлари орқали ушбу ер майдонини турар жой тоифасига ўтказиб, у ерда кўп қаватли уй қуриш учун рухсат олиб бериш эвазига 10 минг доллар талаб қилган. Аммо Давлат хавфсизлик хизмати, Иқтисодий жиноятларга қарши курашиш департаменти ва ички ишлар органлари ходимлари томонидан ўтказилган тезкор тадбирда, у олдиндан 110 минг долларни олган вақтида ушланган.
Ҳозирда мазкур шахсларга нисбатан жиноят ишлари қўзғатилиб, тергов ҳаракатлари олиб борилмоқда.
Сўнгги ойларда ерни ноқонуний сотишга уриниш ҳолатлари
2025 йил март ойининг бошларида Навоий, Андижон, Фарғона ва Тошкент вилоятларида ер майдонларини ноқонуний сотмоқчи бўлганлар ушланиб, жиноят ишлари қўзғатилганди. Хусусан, пойтахтда яшовчи фуқаро Тошкент туманида жойлашган ва давлат захирасида бўлган 16 сотих ерни 352 минг долларга харидорга сотишга келишиб ҳамда юқори лавозимда ишловчи танишлари орқали унинг номига расмийлаштириб беришни ваъда қилиб, олдиндан 30 минг доллари олган вақтида ушланган. 26 март куни Самарқандда давлат захирасидаги 2 гектар ерни 100 миллион сўмга сотмоқчи бўлган шахс қўлга тушгани хабар қилинганди.
Февраль ойида Фарғонада фуқаро 2,5 гектар ерни 650 минг долларга сотишга келишиб, олдиндан 100 минг долларни олган вақтида ашёвий далиллар билан ушланганди. Тошкент вилояти Оҳангарон туманида жойлашган ва қишлоқ хўжалигига мўлжалланган 32 гектар ерни 2,4 млн долларга ноқонуний сотмоқчи бўлган шахс қўлга олинганди.
Сурхондарё вилоятида қишлоқ хўжалигига мўлжалланган 45 сотих ерни 60 минг долларга сотишга келишиб, 56,7 минг доллар ва 43 миллион сўм олган вақтида қўлга тушганди. Хоразм вилоятининг Урганч туманида фуқаро давлат захирасида бўлган 24 сотих ер майдонини кадастр тизимида ишловчи танишлари орқали харидор номига расмийлаштириб бериш эвазига 45 минг доллар ва 13 миллион сўм олган вақтида ушланганди.
Изоҳ (0)