Тошкент шаҳар ҳокимлигини қўриқлаш учун 3,3 миллиард сўм сарфланади

Жорий йилда Тошкент шаҳар ҳокимлигини қўриқлаш хизматига 3,3 миллиард сўм ажратиш бўйича ҳоким қарори қабул қилинди.

Тошкент шаҳар ҳокими Шавкат Умурзоқовнинг 2024 йил 26 мартдаги қарори билан ҳокимлик маъмурий биносини сақлаш, харидлар ва хизматлар учун маҳаллий бюджетдан 7,3 миллиард сўм ажратилади.

Ҳужжатда ёзилишича, жорий йилги харажатлар сметасида энг кўп маблағ, яъни 3,3 миллиард сўм Тошкент шаҳар ҳокимлигини қўриқлаш хизмати харажатларига ажратилиши кўзда тутилган.

Сметада ҳокимликка қарашли автомобиллар ёнилғи харажатларига 690 миллион сўм, автомашиналарга техник хизмат кўрсатишга 150 миллион сўм, автомобиль мойларига 48 миллион сўм сарфланиши белгиланган.

Лифтларга хизмат кўрсатишга 62 миллион сўм, махсус мебеллар сотиб олишга 150 миллион сўм, гулдасталар харид қилиш ва гуллар билан безатиш учун 60 миллион сўм тўланади.

Янги йил байрами муносабати билан бино ва арчани безатишга 25 миллион сўм, мажлислар заллари учун гилам харид қилишга 100 миллион сўм ажратилади.

Сметага кўра, ҳокимлик интернет тармоғи тўловларига 68,5 миллион сўм, ҳоким қабулхонаси ва матбуот хизмати учун алоҳида кучайтирилган интернет тармоғи тўловига 45,3 миллион сўм, бинода интернет тармоғини кучайтириш учун махсус қурилмага 45 миллион сўм сарфланади.

Қарорда бинода фойдаланилган электр энергияси тўловларига 700 миллион сўм, табиий газ тўловларига 400 миллион сўм, принтер бўёқларини алмаштириш ва таъмирлашга 60 миллион сўм ажратилиши белгиланган.

Шунингдек, қарорда ҳокимлик биноси атрофини ободонлаштириш, сантехника, электротехника ва бошқа хўжалик моллари харид қилиш харажатлари ҳам кўрсатиб ўтилган.