Ўзбекистонда айрим ўқитувчиларга 100 фоиз миқдорида ҳар ойлик қўшимча устама тўланади

Ўзбекистонда айрим мактабларда фанларни чет тилида ўқитиш амалиёти жорий этилади. Бу ҳақда Адлия вазирлиги хабар берди. 

“Ихтисослаштирилган мактаблар тармоғини кенгайтириш ва уларнинг фаолиятини янада такомиллаштириш чора-тадбирлари тўғрисида”ги президент фармонига кўра, 2024/2025-ўқув йилидан агентлик тизимидаги ижод ва ихтисослаштирилган мактабларда:

• чет тилини билиш бўйича камида B2 даражадаги сертификатга эга бўлган ўқитувчилар томонидан фанларни чет тилида ўқитиш амалиёти жорий этилади; 
• математика, физика, кимё, биология, табиий фанлар (science), информатика ва ахборот технологиялари фанларидан дарсларни чет тилида олиб борган ўқитувчиларга тариф ставкасига нисбатан 100 фоиз миқдорида ҳар ойлик қўшимча устама тўланади.

Президент мактабларининг маҳаллий ўқитувчиларига уларнинг тариф ставкасига нисбатан 350 фоиз миқдорида ҳар ойлик қўшимча устама тўлаш тартиби жорий этилади. Бунда устама педагоглар томонидан қуйидаги шартларнинг барчаси бажарилган тақдирда тўланади: 

• Кембриж (Cambridge Assessment International Education) халқаро таълим дастурлари асосида дарс бериладиган фанларни ўқитиш бўйича 3 та (Introductory, Extension, Marking) курсни муваффақиятли тугатиш ва бу ҳақида тегишли сертификат олиш;
• Президент мактабларида камида 1 йиллик иш стажига ва чет тилини билиш бўйича камида C1 даражадаги ёки унга тенглаштирилган мос даражадаги халқаро сертификатга эга бўлиш.