Ўзбекистонда миллий сертификатга эга она тили ва адабиёт ҳамда тарих фани ўқитувчиларига ҳар ойлик қўшимча устама тўланади. Бу ҳақда президентнинг “Ўзбекистон – 2030 стратегиясини Ёшлар ва бизнесни қўллаб-қувватлаш йилида амалга оширишга оид давлат дастури тўғрисида”ги фармонида белгиланди.
Унга кўра, 2025 йил 1 январдан бошлаб Мактабгача ва мактаб таълими вазирлиги тизимидаги умумий ўрта таълим муассасаларида она тили ва адабиёт ҳамда тарих фанлари бўйича Олий таълим, фан ва инновациялар вазирлиги ҳузуридаги Билим ва малакаларни баҳолаш агентлигининг миллий баҳолаш тизимида олинган тегишли даражадаги сертификатга эга бўлган ва ушбу фанлардан дарс берувчи педагог кадрларга уларнинг тариф ставкасига нисбатан 50 фоиз миқдорида ҳар ойлик қўшимча устама тўланади.
Ушбу тоифа ўқитувчиларга қўшимча устама тўланиши ҳақида Шавкат Мирзиёев 2023 йил 22 декабрь куни бўлиб ўтган Республика Маънавият ва маърифат кенгаши йиғилишида маълум қилганди. Ўшанда давлат раҳбари ўзбек тилининг давлат тили сифатидаги нуфузини оширишга алоҳида эътибор қаратилишини айтганди.
Президент ўзбек тили ва адабиёти фани ўқитувчиларига ҳам халқаро сертификатга эга бўлган бошқа фан ўқитувчиларидан кам бўлмаган миқдорда қўшимча ҳақ тўланиши адолатдан бўлишини таъкидлаган.
Президент фармонида, шунингдек, умумий ўрта таълим муассасалари директорларини менежерлик бўйича сертификациялаш тизими жорий этилиши белгиланди. Бунда, директорларга малакавий талаблар аниқ белгиланиб, улар ҳар беш йилда бир маротаба аттестациядан ўтказилади.
Давлат умумий ўрта таълим муассасалари директори лавозимига номзодларни менежерлик ўқув курсларида ўқитиш ва уларга менежерлик сертификатини бериш тартиби тўғрисидаги низомга кўра, сертификатга эга директорлар уни олгандан кейин 3 йил давомида малака ошириш курсларидан озод этилади.
Изоҳ (0)