Ижтимоий тармоқларда “Ўзбекистондаги заправкаларда яна навбат бошланди” сарлавҳаси остида Фарғона ҳамда Сурхондарё вилоятидаги айрим метан заправкалар (автомобилларга газ тўлдириш компрессор шохобчалари) умуман ишламаётгани ҳақида хабарлар тарқалган эди.
Мазкур ҳолат юзасидан “Ҳудудгазтаъминот” АЖ ахборот хизмати раҳбари Дилором Жуманиёзова “Дарё”га изоҳ берди. Унинг айтишича, Термиз шаҳри ва Термиз туманида жойлашган АГТКШга газ етказиб бериш вақтинча тўхтатилишига техник носозлик сабаб бўлган.
Носозлик бартараф этилиб, Термиз шаҳри ва Термиз туманида жойлашган автомобилларга газ тўлдириш компрессор шохобчалари (АГТКШ)ни табиий газ билан таъминлаш қайта тикланди. Айни пайтда мазкур шохобчаларга табиий газ етказиб бериш бир маромда давом этмоқда, деди Дилором Жуманиёзова.
Фарғона вилояти туманидаги метан заправкаларга эса Риштон ГТС 3-саноат тармоғига ўрнатилган ЭГХУнинг давлат қиёслов кўриги тугагани сабабли тармоқ соат 00:00 дан 13:00 га қадар ўчирилган.
Шу жараёнда тармоқдаги 7 та АГТКШ вақтинча ишламаган. Натижада қўшни тумандаги (Бағдод тумани) 4 та метан заправкада тирбандликлар кузатилган. 13:00 дан ГТС тармоғи ёқилган ва 7 та метан заправка ишга тушган. Шундан сўнг мазкур ҳолат юмшаган.
Изоҳ (0)