Ўзбекистонда муаммоли кредитлар миқдори 1,64 млрд долларга етди

Марказий банк 2024 йил 1 август ҳолатига кўра, мамлакатнинг тижорат банкларидаги муаммоли кредитлар (NPL) ҳажми 20,82 триллион сўмни (1,64 миллиард доллар) ташкил этганини маълум қилди.

Бу кўрсаткич банклар эгалик қилаётган жами 500,64 триллион сўмлик (39,4 миллиард доллар) кредит портфелининг 4,2 фоизига тўғри келади.

Давлат банклари 348,29 триллион сўмлик (27,4 миллиард долларлик) кредит портфели билан банк секторида етакчиликни давом эттирмоқда. Уларнинг муаммоли кредитлари 15,25 триллион сўмни (1,2 миллиард долларни) ташкил этган, бу жами кредитларининг 4,4 фоизига тенг. Бу бутун банк секторининг ўртача кўрсаткичидан юқори ҳисобланади.

Нодавлат банкларнинг кредит портфели 152,35 триллион сўмни (11,9 миллиард доллар) ташкил этади. Шундан муаммоли кредитлар 5,57 трлн сўмни (438,6 млн доллар) ёки жами кредитларнинг 3,7 фоизини ташкил этади.

Давлат банклари орасида Ўзбекистон Миллий банки муаммоли кредитлар ҳажми бўйича энг юқори кўрсаткичга эга. Банкнинг 103,06 триллион сўмлик (8,1 миллиард доллар) кредит портфелидан 3,47 триллион сўми (273,2 миллион доллар) муаммоли кредитларни ташкил этиб, бу умумий портфелнинг 3,4 фоизига тўғри келади. Ундан кейин Бизнесни ривожлантириш банки туради. Унинг 21,6 триллион сўмлик (1,7 миллиард доллар) кредит портфелидан 2,48 триллион сўми (195,3 миллион доллар) ёки 11,5 фоизи муаммоли кредитлардир.

Учинчи ўринда Ўзсаноатқурилишбанк жойлашган бўлиб, унинг 60,31 триллион сўмлик (4,7 миллиард доллар) кредит портфелидан 2,21 триллион сўми (174 миллион доллар) ёки 3,7 фоизи муаммоли кредитлардан иборат.

Нодавлат банклар орасида “Ипотека Банк” муаммоли кредитлар бўйича етакчилик қилмоқда. Банкнинг жами муаммоли кредитлари 3,34 триллион сўмни (262,9 миллион доллар) ташкил этиб, бу унинг 35,68 триллион сўмлик (2,81 миллиард доллар) кредит портфелининг 9,4 фоизига тўғри келади. Кейинги ўринларда “Kapitalbank” ва “Ҳамкорбанк” турибди.

“Kapitalbank”нинг муаммоли кредитлари 728 миллиард сўмни (57,3 миллион доллар) ташкил этиб, бу унинг кредит портфелининг 2,5 фоизини ташкил қилади. “Ҳамкорбанк”нинг муаммоли кредитлари эса 230 миллиард сўмни (18,1 миллион доллар) ташкил этиб, бу унинг кредит портфелининг 1,3 фоизига тенг.

Жами кредит портфелига нисбатан муаммоли кредитларнинг энг юқори улушига эга банклар Мадад Инвест Банк (20,9 фоиз), Гарант Банк (14,3 фоиз) ва Бизнесни Ривожлантириш Банки (11,5 фоиз) ҳисобланади.