Ўзбекистон ҳукумати раҳбари Абдулла Арипов бугун ўтказилган йиғилишда метан нархини давлат томонидан тартибга солиш бекор қилинишини маълум қилди. Бош вазир матбуот котибининг маълум қилишича, президент топшириғига кўра, нон ва буғдой нархлари эркинлаштирилгани каби, метаннинг нархини ҳам жойларда рақобат асосида барқарорлаштириш чоралари кўрилади.
1 август куни Ўзбекистон бош вазири Абдулла Арипов президент топшириғига биноан вазирлик ва идоралар раҳбарлари иштирокида ёқилғи-энергетика масалалари бўйича йиғилиш ўтказди, деб хабар қилди ҳукумат раҳбари матбуот котиби Бекзод Ҳидоятов.
Унинг сўзларига кўра, йиғилишда “метан нархининг юқори чегарасини” бекор қилиш масаласи муҳокама қилинди, эндиликда давлат бу соҳада нарх белгилашга аралашмайди.
Бош вазир президентнинг Рақобатни ривожлантириш қўмитаси, Бош прокуратура ва Энергетика вазирлигига ёқилғи қуйиш шохобчалари, жумладан, пропан гази бўйича рақобат муҳитини яратиш орқали нархларнинг кескин ошишига йўл қўймаслик чораларини кўриш бўйича топшириқларини эълон қилди.
“Давлатнинг нархларни тартибга солишга аралашуви рақобат муҳитининг бузилишига олиб келади. Шу сабабли, нархларнинг юқори чегараси бўлмайди; Рақобат қўмитаси ва Бош прокуратурага нархларни барқарорлаштириш бўйича президент топшириғи берилди. Бу худди нон ва буғдой нархларини либераллаштириш мисолида бўлгани каби амалга оширилади”, деди Бекзод Ҳидоятов.
Бош вазир матбуот котибининг таъкидлашича, тадбиркорларга нархларни белгилашда эркинлик бериш “ўзлари хоҳлаган нарсани қилиш имкониятини англатмайди”. Шу муносабат билан тўртта сектор раҳбарлари нархларнинг сунъий равишда бир неча баробар оширилмаслигини таъминлайди.
Бундан ташқари, метан шохобчалари сиқилган газ сарфини ҳисоблаш учун Uzinfocom’дан тизим ўрнатиши керак бўлади.
Ижтимоий тармоқларда Андижон вилоятида газ қуйиш шохобчаларининг максимал нархи 3950 сўмдан белгиланиши ҳақида маълумот тарқалди. Бекзод Ҳидоятов бу ҳақиқат эмаслигини, ҳокимликларга бундай кўрсатма берилмаганини таъкидлади.
Тез орада Энергетика вазирлиги, Рақобат қўмитаси ва Бош прокуратура томонидан соҳадаги ўзгаришлар ҳақида алоҳида матбуот анжуманлари ўтказилади.
Иқтисодчи Отабек Бакиров аввалроқ метан нархининг юқори чегараси бекор қилинишини тўғри қарор деб атаган эди. Унинг сўзларига кўра, “ҳукумат нархларни белгилаб, амалдорлар лимит тақсимлаб, жадвалларни ўрнатиб, кимга газ бериш ва газ бермасликка қарор қиладиган” режимдан воз кечиш керак.
2024 йил 25 май куни Вазирлар Маҳкамасининг метан газ учун белгиланган энг баланд чакана нархнинг амал қилиш муддатини узайтириш ҳақидаги қарори қабул қилинган ва 1 августга қадар автомобилларга газ тўлдириш шохобчаларида бир куб метр метан газнинг энг юқори нархи 3750 сўм этиб белгиланган эди.
Молия вазирлиги ахборот хизматининг “Дарё”га маълум қилишича, метан газ учун белгиланган энг баланд чакана нархнинг амал қилиш муддати узайтирилмаган.
Қайд этиш керакки, 2023 йилнинг сентябрь ойида қабул қилинган ҳукумат қарори билан автомобилларга газ тўлдириш шохобчаларида метан газ нархи дастлаб 3250 сўм, шу йилнинг апрелидан 3350 ва 1 июндан бошлаб эса 3750 сўмдан ошиб кетмаслиги белгиланган эди.
Эндиликда тадбиркорлар метан газ нархини ўзлари мустақил белгилайди. Шу билан бирга, тўртта сектор раҳбарлари нархларнинг сунъий равишда бир неча баробар оширилмаслигини назорат қилиб боради.
Изоҳ (0)